Erum nú stödd í veldi Dana! Komum hingað á mánudeginum eftir 1230 km akstur - lögðum af stað á sunnudeginum eldsnemma um morguninn þar sem við áttum ferju kl. 9 yfir sundið. Brunuðum síðan beint til Dusseldorf þar sem við vorum mætt á svæðið um 5 leytið á þetta líka fína Renaissance hótel - mjög rólegt var á hótelinu og varla nokkur önnur sála að flækjast þar. Borðuðum kvöldmat í 180 metra hæð í turni sem gnæfði yfir borginni - útsýnið var þó ekki sem best þar sem mikil þoka var yfir borginni og sást ekki einu sinni í toppinn á turninum þegar staðið var fyrir neðan. Merkilegt var að þegar við komum á svæðið og ég tjáði manninum í afgreiðslunni niðri að við værum að fara á veitingastaðinn uppi, þá rukkaði hann okkur um 6 evrur pr mann fyrir það að taka lyftuna upp ... fannst mér það skrítið og spurði hvort miðinn gilti upp og niður ... komst þá að því að miðinn gilti upp en frítt væri að fara niður ... ekki fannst mér það mjög traustvekjandi og spáði í því hvort að það þyrfti þá að fara einhverja aðra leið en lyftuna niður ...

Við þeystum síðan á mánudeginum um hraðbrautir Þýskalands til hennar Evu í Odense - stoppuðum lítillega til að fá okkur kaffi og teygja úr okkur en helsta stoppið var á grensunni margfrægu. Fórum þar í Citti til að fylla á vínskápinn hennar Evu og skoða okkur um þennan margumtalaða stað. Þegar komið var til Danmerkur var meiri þoka og hitastigið komið niður fyrir frostmark - gekk því umferðin aðeins hægar fyrir vikið en við mættum á svæðið til Evu um kl. 19.45 ... og var þá tekið á móti okkur með jólabjórsmökkun og var byrjað á einum 7% sem rann vel niður eftir þreytandi aksturinn. Í matinn var síðan þessi líka fína svínapörusteik fyllt að hætti Jamie Olivers ... alveg svaðalega gott. Drukkum einnig dáldið meira af jólabjór, Tuborg og Fisherman ...

Inga Huld var nú bara nokkuð góð í bílnum þó ferðin hafi verið þreytandi - hún hlustaði á vasadiskóið sitt, las bækur og lék sér með dúkkur - við reyndum síðan að spila fyrir hana prúðuleikara DVD í fartölvunni en batteríið er orðið slappt og dugði bara í 40 mínútur en ætti að duga í 2 klukkutíma.

Þriðjudagurinn var notaður til að skoða miðbæ Odense - kom á óvart hversu fínn og flottur bærinn er ... minnti dáldið á Ísland þar sem allt er voðalega afslappað og rólegt hérna. Eva þrammaði með okkur í helstu búðir og sýndi okkur merkustu staðina og hlutina.

Í gær, miðvikudag, var síðan stefnan tekin til Kóngsins Köben í lestinni - danska veðrið var nú ekki uppá marga fiska þar sem kalt var og þoka ... okkur tókst þó að skoða okkur um í borginni og byrjuðum á smörrebröd í Nyhavn - ekki amalegt það. Gott var að hafa Evu þar sem hún dró okkur um svæðið og rataði allt einsog herforingi. Strikið var síðan arkað og danskt jólaskraut og Georg Jensen verslað - Inga Huld var líka heppin þar sem að það var 50% afsláttur í Lego-fatabúðinni og var hún dressuð upp.

Í dag er svo farið að rigna þannig að snjórinn sem kom á þriðjudagskvöldið er farinn ... Ingu ekki til mikillar skemmtunar ... við byrjuðum daginn á dönsku bakkelsi, sem er töluvert betra en það breska, og ætlum svo í bíltúr um Fjón um eftirmiðdaginn. Síðan þarf að versla rakettur og bombur fyrir gamlárskvöld - búið er að skanna markaðinn lítillega og er verðið hagstætt. T.d. er hægt að kaupa 9 stórar rakettubombur í pakka fyrir 100 dkr ... þannig að það þarf að versla dáldið ... Við verðum í gamlárskvöldmat hjá foreldrum Evu, Elínu og Palla, sem búa hér í Odense þannig áramótin verða íslensk.

Annars mikið um að vera og tíminn fljótur að líða - þurfum bráðlega að gera okkur klár fyrir heimferðarakstur þann 1. janúar 2005 !!

Ingu Huld fannst nú jólaballið í bankanum skrítið jólaball - enda var voða lítið jólalegt við það ef frá eru taldir tveir jólasveinar sem voru inní tveimur skógarkofum. Þrátt fyrir það þá var þrusufjör - það var sem sagt Jungle Book þema og voru apar, bangsar, fíll, býflugur, snákur og síðan Mowgli vafrandi um svæðið og léku síðan söguna uppá sviði. Inga Huld fékk þetta líka fína "pink tiger" andlit málað á sig og var það í stíl við fötin sem voru að sjálfsögðu bleik ... Þegar hún var búin að leika sér í tækjunum, labba í gegnum skóginn, föndra, leira, fá sér nammi á nammibarnum og hlaupa um þá var hægt að fá sér að borða og var þá margt í boði - voru þeir með pizzur, hamborgara, núðlur, pulsur, chicken nuggets, fiski fingur, franskar kartöflur, samlokur og eitthvað fleira ásamt ís, ávöxtum, kökum og nammi sem hægt var að skola niður með hinum og þessum drykkjum einsog gosi, djús, smoothies, bjór, hvítvín eða rauðvín ... það var sem sagt alveg spurning um það eftir allt þetta hvort það þyrfti nokkuð að hafa kvöldmat! Okkur fannst nú samt mjög flottir tveir súkkulaðigosbrunnar - annar brunnurinn var venjulegt súkkulaði og hinn var hvítt súkkulaði með jarðaberjabragði - virkaði þetta sem sagt þannig að settur var sykurpúði eða ávextir á pinna og síðan gat maður stungið honum inní súkkulaðið þar sem það lak niður gosbrunninn og súkkulaðihjúpað hann ... ekki slæmt ...

Inga Huld var afskaplega ánægð með pakkana í gærkvöldi og fannst hún mikið heppin. Situr hún núna í stofunni og hlustar á vasadiskó með söguspólu í og leikur sér einnig að playmoinu sem hún fékk - núna sita playmokallarnir í stofunni sinni og horfa á sjónvarpið og voru þeir sem sagt að stíga upp úr rúminu sínu og búnir að snyrta sig og gera morgunverkin á klósettinu. Hún er einnig búin að pakka niður fyrir ferðalagið okkur öllu sem hún þarf í Baby Born ferðatöskuna sína. Áður en hún fór að sofa í gær þá var lesið fyrir hana í Fíu Sól bókinni sem er um 7 ára stelpu sem hefur bleikan sem sinn uppáhaldslit og er í stjörnumerkinu krabbanum - er reyndar búin að breyta um stjörnumerki og er í rósrauða fiðrildamerkinu (eða einhverju álíka). Hún fékk nú ýmislegt meira og var mikið pakkaflóð undir jólatrénu - bækur, föt, sokka og dúkku - ég held að það hafi nú bara ekkert vantað uppá, hún fékk nokkurn veginn allt sem hægt er að hugsa sér. Fékk reyndar ekki legókubba en fékk svo flottan legókubbakassa í skóinn frá jólasveininum um morguninn.

Dagurinn í dag verður tekinn rólega og þarf að fara að pakka fyrir Danmerkurferðina þar sem vakna þar eldsnemma í fyrramálið - ferjan fer kl. 9 og það þarf að mæta hálftíma fyrir brottför og það tekur a 1,5 til 2 klukkutíma að keyra á höfnina ... vonandi getum við uppfært bloggið á meðan Danmerkurdvöl stendur.

Við óskum ykkur gleðilegra jóla

Styttist óðum í jólin - ég er í jólafríi á aðfangadag og mæti ekki aftur í vinnu fyrr en fimmtudaginn 6. janúar. Við förum þó öll í vinnuna á aðfangadag þar sem að það er krakkajólaball og voða fjör. Það er búið að taka alla vikuna að setja upp svæðið á þriðju hæð bankans og er "Jungle Book" thema ... skilst mér ... ekki kannski alveg það allra jólalegasta, en samt eflaust mjög skemmtilegt fyrir Ingu Huld.

Inga Huld er farin að verða of skýr ... "jólasveinninn" gaf henni í skóinn um daginn kúlur sem hægt er að þræða uppá band svo úr verður hálsmen - þetta var sem sagt keypt í Tókýó og var með tilheyrandi japönskum stöfum utaná sem sagt. Þegar Inga kíkti í skóinn sinn (sem er nú oft um miðjar nætur) þá var eitt af því fyrst sem hún sagði "Jólasveinninn hefur keypt þetta í Tókýó" og tók sem sagt eftir merkjunum á umbúðunum, bætti síðan við "... silly jólasveinn". Annars var hún mest ánægð um daginn þegar hún fékk kassettu með jólalögum á sem vorum sungin af krökkum. Þetta dröslaðist hún síðan með í Fischer Price kassettutækinu sínu um allt hús í nokkra daga sér til mikillar skemmtunar en öðrum til minni skemmtunar. Ég var nú farinn að undrast hversu vel batteríin duga í þessu tæki hennar þar sem ekki hefur nú verið skipt um þau síðan hún fékk það fyrir mjög svo löngu síðan.

Bíllinn er kominn úr tímareimaskiptingu og búið er að gera við sprungna dekkið - ekkert reyndist vera að geislaspilaranum, veit ekki alveg hvað hefur verið málið með hann síðasta sumarið ... kannski of heitt ...

Annars virðist ekki vera mjög góð færðin síðustu dagan í norðanveðri Evrópu, hálka og snjór í Þýskalandi og sýnist okkur vera spáð rigningu og leiðindum. Um daginn var samt tilkynnt að það voru mjög háar líkur á því að við fengjum hér hvít jól - sem er gleðilegt en þó bagalegt þar sem ekki er gott að keyra mjög mikið á sumardekkjunum í snjónum, spurning hvort taka þurfi með naglana?!

BARA 2 DAGAR TIL JÓLA

Stelpurnar komnar í jólafrí og búið að skreyta jólatréið!! Það vantar bara að elda hamborgarahrygginn (engar rjúpur ...) og setja pakkana undir tréið og við erum klár fyrir jólin. Ég var í fríi í gær (fimmtudag) og notuðum við Jóa tímann til að fara í bæinn að kíkja á jólastemmninguna og kaupa jólagjöf fyrir Ingu Huld, sem var í skólanum. Jólastemmningin var nú lítil - 10 stiga hiti, rigning og ekki sást í jólaskreytingar fyrir birtunni þar sem þetta voru að mestu jólaljósaskreytingar. Eina sem að minnti á jólin var lítil lúðrasveit Hjálpræðishersins sem spilaði jólalög og hristi peningabauka í undirtakti.

Jóa kynntist um daginn hjálpsemi bretanna þar sem það sprakk hjá henni á leiðinni í skólann. Þar sem stelpurnar tvær voru stopp hjálparvana úti í vegarkanti og Jóa að tala við mig kveinandi yfir því að það væri sprungið, þá var bankað á gluggann hjá henni og stóð þar maður sem bauð fram aðstoð sína. Eftir mikið streð við umskiptinguna (rærnar stóðu eitthvað á sér ...) var maðurinn drulluskítugur upp fyrir haus en hlaut mikið þakklæti í staðinn. Þeir klikka ekki bretarnir!! ... vinsamlegast minnist hans því í þakkarbænum jólanna.

Á sunnudaginn er svo planað að fara með bílinn á dekkjaverkstæði til að laga dekkið og hafa vetrardekkið í lagi - ætli það þurfi þá ekki að láta tékka á hinum 3 dekkjunum í leiðinni. Mánudaginn er svo búið að taka frá í tímareimaskiptingu þar sem það er víst komið á tíma samkvæmt leiðavísi bílsins - í leiðinni vonast ég til að þeir geti lagað geislaspilarann í bílnum sem gafst upp á því í sumar að spila geisladiska! ... það er nú kannski bara spurning um að fara að skipta um bíl ...?!

cheers

Það var nú góður matur í gærkvöldi - ákváðum að hafa jólahlaðborð með öllu tilheyrandi. Reyndar ekki alveg öllu tilheyrandi þar sem að það mátti ekki opna maltið og appelsínið heldur á að geyma það nær jólum ... Við vorum annars með íslenska jólasíld, graflax (grafinn hér heima - við erum bara orðin nokkuð góð í því!), pate og jólaosta. Algjört nammi og mjög jólalegt. Fyrir kvöldmat ætlum við síðan að gera okkur ferð og kaupa jólatré og fá okkur hamborgara í kvöldmatinn. Jólatréið verður síðan sett upp um næstu helgi og skreytt - dáldið í fyrri kantinum á íslenskum mælikvarða en bretarnir eru mjög fljótir í þessu og sjáum við víða inn um stofugluggann skreytt jólatré. Þess vegna förum við dáldin milliveg að þessu.

Fengum skemmtilega sendingu um daginn. Þegar ég var á þriðjudeginum í leigubíl á leiðinni á Heathrow þar sem ég var að fara í flug til Amsterdam þá hringdi Jóa mjög spennt og spurði mig hvað ég hefði verið að panta þar sem það væri komin sending til mín. Ég tjáði henni að það væri nú bara leyndó (hafði ekki hugmynd um hvað þetta var) og þyrfti að geyma kassann þar til ég kæmi heim aftur á fimmtudagskvöldið frá Frankfurt. Ekki leist Jóu minni vel á það og fannst það frekar súrt - fékk hún á endanum að opna kassann og viti menn ... upp úr honum kom heilmikið af bóluplasti og að lokum fann hún pakkann og kort sem á stóð að þar sem við hefðum verið meðal 20 fyrstu til að bóka ferju og hótelgistingu í gegnum ferry.to þá hefðum við unnið þessa líka forláta kampavínsflösku !! Vorum ánægð með það þar sem þetta kom mjög á óvart og höfðum ekki hugmynd um að við værum að tilraunakeyra einhverjar bókanir í kerfinu þeirra og vonum því í framhaldi af þessu að hótelgistingin og ferjan sé allt skráð rétt.

Annars tókst Ingu Huld loks að smita mig og Jóu af kvefi og hósta og erum við því öll orðin lasin! Inga Huld er þó einna skást þar sem henni er tekið að batna ...

cheers

Það er tekið að hlýna hér aftur eftir "kuldkastið" - hitinn fór alveg niður í 2 til 3 gráður og var barasta skítakuldi. Núna er komið yfir 10 gráðurnar þannig að þetta er að verða einsog íslenskt júníveður ...

Annars þá er svaðalegur hálsbólguvírus sem gengur hér laus og eru nánast allar stelpurnar í bekknum hennar Ingu hóstandi. Fór með Ingu til læknis í morgun til að láta kíkja á hana og gat hann mælt með einhverju róandi svo hún gæti sofnað - ekki bara svo að hún gæti sofnað heldur einnig svo við gætum sofnað! Það er bara um leið og hún leggst á koddann þá byrjar hóstakast sem stendur yfir langt fram yfir miðnætti. Við bíðum svo bara eftir því að smitast ... ætli við fáum þetta ekki rétt fyrir jólin ...

Jóa hlustar núna í tölvunni á Jólastjörnuna þar sem spiluð eru íslensk jólalög á hverri mínútu - alveg magnað hvað það eru til mörg léleg jólalög, enda eflaust fljótlegt að spila öll "góðu" íslensku jólalögin.

Með jólakveðju!