Um síðustu helgi fengum við stórfjölskyldu Sigurgeirs í heimsókn og var grillað íslenskt lambafillet í tilefni dagsins. Inga Huld var að vonum lukkuleg þar sem 5 ára og 8 ára dætur Sigurgeirs var sýnt allt dótið og mikið var leikið í Playmo og öðru sem fram var tekið.

Ég var síðan á miklu flakki í vikunni og endaði vikuna í mikilli sumarblíðu í Sviss - nánar tiltekið í Zurich, Basel og Genf ... ferðaðist um í lest og naut frábærs landslags þar sem brunað var um lendur Sviss ...

Í gær var síðan nýr veitingastaður prófaður - haldið var á kínverska veitingastaðinn Kai sem staðsettur er í Mayfair ... áttum þar mælt mót við Elvu og Óla sem eru hér í heimsókn. Það er alveg óhætt að mæla sér mót á þessum stað og mælum við sterklega með staðnum. Matseðillinn er með þeim lengstu sem ég hef séð og olli það nokkrum heilabrotum varðandi val á rétti til að panta - það var bót í máli á meðan þeim heilabrotum stóð að þeir blanda mjög góða kokteila ... ég endaði þó á því að fá mér "Flaming, drunken pork" sem var sem sagt svínakjöt eldað í kampavínssósu og borið fram flambererað í kínversku hrísgrjónavíni ... bragðaðist mjög, mjög vel. Annað sem var pantað var ekki síðra, kannski þó rétt að passa sig á rækjuréttinum sem er eldaður í þremur tegundum af chilli ... hann var dáldið sterkur ...

Hitinn hér fer stígandi og erum við nánast alveg búin að slökkva á allri kyndingu í húsinu - það er alveg á hreinu að eitthvað gott verður grillað í kvöld ... einnig er frí á morgun 2. Maí sem er Mayday ... ekki amalegt það að fá smá aukaafslappelsi. Talandi um frí þá er nú alveg ljóst að það þarf að fara að plana sumarfríið ...

Með bestu kveðju frá Heather Close!!