Það var "open house" helgi í London ... sem sagt ýmsar byggingar opnar fyrir almenning. Í gær fórum við í tvær heimsóknir í miðbæinn, byrjuðum á Lloyds byggingunni í City sem er merkileg fyrir þær sakir að hafa allt "service" (þ.e. leiðslur, lyftur, stiga og stokka) utaná. Við biðum í röð fyrir utan í 40 mínútur og var það vel þess virði því merkilegt var að sjá inni. Þessi bygging hýsir sem sagt Lloyds tryggingamarkaðinn og var byggð á árunum 1978-1986. Skemmtilegt herbergi á efstu hæðinni var í átjándu aldar stíl og hafði Lloyds keypt það 1958 á uppboði til að hafa í eldri byggingunni sinni og fluttu það með sér í nýja húsið. Eftir þetta var ferðinni heitið á 120 Fleet Street sem hýsti Daily Express - sú bygging er besta dæmi um byggingu í Art Deco stíl hér á Bretlandi og var byggð 1932. Þurftum að bíða þar í rétt tæpa 2 tíma til að komast inn og var skemmtilegt þar um að litast þó rýmið væri ólíkt minna og einnig mjög ólíkt því í Lloyds byggingunni. Má síðan að lokum geta þess að húsið er nú í eigu Goldman Sachs sem notar efri hæðirnar fyrir ráðstefnur og fundaherbergi en hinn magnaði inngangur Daily Express sem var lýsandi um hraðann og ringulreiðina í bresku pressunni hefur nú lokið sínu hlutverki og safnar ryki ... sorglegt það ...

Í dag var stefnan sett á 3 íbúðarhús í nágrenni okkar og var því farið á bílnum. Það var áhugaverður bíltúr þar sem við fengum að skyggnast inn á heimili hjá venjulegu fólki. Eitt var uppgerð gömul kirkja og var mjög vel heppnað og dáldið töff, annað var eina dæmi í Bretlandi um raðhús í anda módernismans hannað af Lubetkin og var mjög flott en sorglegt að það var í niðurníslu og lítið hugsað um það af eigendunum og þriðja var vel misheppnað einbýlishús í umhverfi blokka ...

cheers