Jólin voru haldin gleðileg heima á Íslandi - fórum í 4 jólaboð og var nóg etið og drukkið (þ.e.a.s. af jólaöli). Íslandsdvölin var góð og fengum við allar tegundir af veðráttu þennan stutta tíma sem við dvöldum heima ... það er náttúrulega partur af prógramminu. Við fórum einnig í gott partý, röltum Laugaveginn á Þorláksmessu, tókum kvöldrúnt um bæinn og kíktum í Kringluna ... allt virtist vera einsog það átti að vera þó að hægt væri að spotta nokkrar breytingar hér og þar. Kristján bróðir Jóu fylgdi okkur síðan með út og mun dvelja fram í miðjan janúar.

Herra Níels var bókaður í gistingu á meðan og var hann mjög ánægður að sjá alla aftur og komast heim - virtist hann kanna vel og vandlega hvort hann væri ekki örugglega kominn aftur heim á réttan stað. Okkur fannst nú leiðinlegt að skilja hann eftir svona aleinan yfir jólin en hann virðist sem betur fer hafa fyrirgefið okkur það fljótt.

Jæja, þá líður bara að Íslandsferð ... verðum við mætt á svæðið eldsnemma á fimmtudagsmorgni og dveljum fram yfir jól. Mikill spenningur í liðinu og finnst Ingu Huld eiginlega ómögulegt að geta ekki verið aðeins lengur. Hér er búið að versla flestallar jólagjafir og er því nóg af farangri og öðru hafurtaski ... einnig þurfti að sjá til þess að enginn færi í jólaköttinn!

Herra Níels er afskaplega ánægður með allt jólaskrautið sem búið er að setja út um allt. Þegar Jóhanna kom heim í dag þá voru nokkrir jólasveinar komnir út um gólf og síðan finnst honum mjög skemmtilegt að taka jólakúlur af jólatrénu og rúlla þeim um íbúðina ... þegar reynt er að siða hann til þá stingur hann sér undir jólatrésmottuna eftir að hafa hlaupið nokkra hringi í kringum jólatréið ... hann veit sko alveg hvað á að gera við svona jólatré!

Einnig þarf sífellt að vera að vökva jólatréið en líklega er það Herra Níels sem svalar þar þorsta sínum mun meira heldur en jólatréið ... einhverra hluta vegna finnst honum vatnið þar mun girnilegra en það sem er í vatnsdallinum hans ...

Inga Huld er búin að reyna að útskýra í skólanum jólasveinana þrettán og skóinn í glugganum. Ekki komst það alveg rétt til skila þar sem að kennarinn hennar sagði okkur að allir krakkarnir í bekknum öfunduðu Ingu Huld svo af því að vera búin að halda jól ... hefur eitthvað misskilist þetta með pakkana frá jólasveinunum.

Það var Winter Concert í BISNY eftir skóla í dag. Krakkarnir sungu og spiluðu og stóðu sig stórvel. Inga Huld flutti ljóð ásamt tveimur vinkonum sínum og var mjög ánægð með þetta allt saman. Á eftir var síðan matarhlaðborð þar sem hver og einn lagði sitt af mörkum. Okkar framlag var hangikjöt og laufabrauð ... nóg var af alls konar mat og var gott á fá Mince Pies úr Sainsbury´s sem ein breska mamman hafði fengið sent að heiman ... fleiri sem sakna Seinsbury´s! Ekki gekk nú mikið á okkar framlag en fólki fannst það þó forvitnilegt - það er allavega til nógur afgangur í einn kvöldmat ... ekki amalegt. Við fórum síðan á Hairy Monk og fengum okkur hamborgara og baunabrauð ... klikkar ekki.

cheers

Dagskráin í dag var þéttskipuð. Fyrst þurfti að baka fleiri smákökur þar sem það er farið að sjást í botninn á hinum boxunum. Síðan var jólatréið skreytt - erum við í fyrra fallinu til að vera með í amerísku stemningunni ... við erum þó ákveðin í því að vera í íslensku stemningunni í janúar og leyfa því að standa til þrettándans. Eftir jólatrésskreytinguna og smákökuát þá var lagt af stað í stuttan verslunarleiðangur í Bloomingdales og Fifth Avenue þar sem ég fékk gallabuxur og peysu, Jóa fékk gallabuxur en jogginggallinn sem kaupa átti á Ingu Huld í Nike búðinni eða GAP var ekki til. Þegar þessu var lokið á var stefnan tekin á Radio City þar sem við áttum miða á sýninguna Christmas Spectacular. Við pöntuðum miðana fyrir tveimur mánuðum og voru þá allar helgarsýningar fyrir jól nánast uppseldar en það var hægt að fá ágætis sæti á sýninguna í desember 2007 ... okkur sæti voru því uppi í rjáfri. Sætin voru bara fín þótt hátt væri setið og var sýningin alveg frábær ... þetta var dans- og söngleikur um jólasveininn og aðdraganda jólanna. Var þar tvinnað saman ballet, kabarett, skautum og bíói með 3D gleraugum. Fannst okkur og þá sérstaklega Ingu Huld mjög skemmtilegt en við ætlum þó ekki að fara aftur að ári í betri sæti ... reynum frekar að komast á eitthvað annað og vera þá aðeins fyrri til að kaupa miða ... kannski bara að fara að skoða í janúar.

Í kvöldmatinn var hangikjöt með uppstúf og laufabrauði ... ekki amalegt! ... hálfgerður Þorláksmessufílingur yfir þessum degi.

cheers

Núna átti að taka slurk í jólaskreytingunum á þessu heimili enda lítill tími til stefnu þar sem við förum til Íslands á miðvikudaginn. Jóa var búin að endurnýja jólaseríurnar þar sem að þær frá Englandi virka ekki rafmagnsins vegna og síðan fjárfestum við í jólatréi. Var einn jólatréssali ekki svo langt frá okkur sem seldi Boston furu og eitthvað annað tré sem hann lofaði okkur að það þyrfti varla að vökva það en samt myndi það halda nálunum mjög vel ... var það líka helmingi dýrara en hin tréin ... við skelltum okkur á það svo það væri nú ekki alveg strípað þegar við komum aftur frá Íslandi. Þegar jólatréið var heim komið þá fengum við nóg af litla jólatrésfætinum sem við keyptum á Hrafnhólaárunum okkar og var ætlaður fyrir ca. metershá tré ... það þurfti yfirleitt sérstaka athöfn til að jólatrésfætur á tveggja metra trjám pössuðu þar ofan í. Keyptum nokkrar jólaseríur í leiðinni þar sem þær voru svo ódýrar ...

Í dag var jólaball íslenskuskólans og var það haldið heima hjá kennaranum í Brooklyn. Var þar dansað í kringum jólatréið, jólasveinninn kom og gaf epli og bangsa og síðan voru borðaðar piparkökur og kleinur. Skemmti Inga Huld sér mjög vel enda eru þær svo margar stelpurnar á svipuðum aldri og leika sér stórvel saman.

Þegar heim var komið af jólaballinu þá fengum við Jin til að koma og passa ... við hjúin vildum kíkja aðeins út í verslunarleiðangur og var helsta takmarkið að kaupa jólagjöf fyrir Ingu Huld. Það gekk nú ekki nógu vel og mælum við ekki með því að komið sé að versla hér svona stutt fyrir jól ... það var 10 mínútna röð til að komast inn í Toy´s R Us sem er á Times Square og síðan var jólagjöfin uppseld þar. Það voru raðir inní fleiri búðir þannig að verslun gengur ekki hratt fyrir sig. Eftir að hafa fundið aðra búð þar sem jólagjöfin var einnig uppseld þá fórum við niður á Union Square og fundum hana loks til þar í annarri tilraun ... eins gott að vera ekki að versla hér á síðustu stundu! Þar sem við vorum bara tvö þá fannst okkur upplagt að nota tækifærið og skella okkur út að borða. Fórum við á Tamarind sem er indverskur staður sem við höfum labbað nokkrum sinnum framhjá og litist vel á - nafnið heillaði líka þar sem við fórum í skemmtilega dinner siglingu, þegar við vorum í Kenýa, á bát sem hét Tamarind og sigldi á ánni við Mombasa. Við mælum hiklaust með þessum stað og gefum honum fjöldann allan af stjörnum!

Þá er enn ein helgin liðin ... og viti menn það er bara ein helgi eftir fyrir jól ... einhverra hluta vegna hefur desember verið mjög fljótur að líða. Það hefur hjálpað til að það er búið að vera nóg að gera en einungis er búið að baka tvær smákökuuppskriftir. Fann þó Stollen í gær í Garden of Eden en það er ekki nándar nærri því eins gott og Taste the Difference Stollenið úr Sainsbury´s ... líka erfitt að slá það út!

Ég og Inga Huld fórum í dag í jólaglöggspartý til Sigga skyrframleiðenda í Tribeca ... þar voru dýrindis veigar ásamt 30 lítrum af jölaglöggi í risastórum potti ... ég var með þeim fyrstu til að mæta og með þeim fyrstu til að yfirgefa svæðið og var potturinn ca hálfur og var því nóg eftir ... ekki slæmt að fá gott heitt jólaglögg í þessum kulda. Það var þó hlýrra í dag heldur en hefur verið undanfarna tvo daga ... hitastigið er aftur komið í plús.

Í gær var þvílíkt kalt en við vorum engu að síður farin snemma út til að kíkja á markaðinn á Union Square en þar er búið að bæta við jólamarkaði. Við byrjuðum á því að kaupa húfu á mig og Jóu ... ekki veitti af áður en eyrun dyttu af okkur. Ég held að það hafi ekki orðið svona hrikalega bítandi kuldi í London en það er þó allavega frískandi og hressandi að fara út samanborið við hitastækjuna sem var hér í sumar ... magnaðar hitasveiflur hérna fyrir ca 3-4 mánuðum var um 40 gráðum (á celsius) hlýrra. Inga Huld fór síðan í íslensku skólann í gær þar sem æft var fyrir jólaballið sem er framundan ... skreyttar voru piparkökur og íslenskt jólalög æfð. Hún ætlaði ekki að vilja að fara heim þar sem það var svo skemmtilegt í "klukk" eða öðru nafni "it" og var orðin móð og másandi.

cheers

Stelpurnar komu til mín í vinnuna og hætti ég snemma um hálfsexleytið svo við gætum farið að rölta um bæinn ... þ.e.a.s. efri bæinn eða uptown að skoða jólaskrautið og í búðarglugga. Byrjuðum í Geox þar sem stelpurnar fengu skó og keypti Inga Huld eins skó og Þórunn Eva fékk um daginn nema það að þeir voru aðeins stærri. Við fórum svo niður Fifth og sáum jólatréið hjá Rockefeller Center þar sem myndin að neðan er tekin ... myndin ekki alveg nógu góð þar sem síminn virkar ekki alveg nógu vel sem myndavél þegar það er farið að dimma. Enduðum svo á því að fá okkur að borða á Turkish Kitchen sem er rétt hjá okkur eftir að hafa labbað alla leiðina heim ... vorum ekki komin þangað fyrr rétt fyrir níu og var Inga Huld því orðin þreytt þegar maturinn var búinn. Mjög góður matur hér - ég fékk mér innbakaða casserólu sem mér viðhæfandi í þessu kuldakasti sem gengur hér yfir ...

cheers

Það er tekið að kólna í veðri og hitamælirinn nálgast frostmarkið ... allir komnir með húfu, trefil og vettlinga en samt er kalt og viti menn, þá datt þeim náttúrulega í hug að skipta um boilerinn þannig að enginn hiti er búinn að vera hér í um sólarhring en einhvern veginn tókst þeim þó að halda heita vatninu á þannig að hægt er að þrífa sig og aðra. Þeir koma því í góðar þarfir hitablásararnir sem ég keypti fyrr í haust og eru búnir að sanna og borga sig ... það er betra að hafa vaðið fyrir neðan sig og vera ekki lausgirtur heldur vera ávallt viðbúinn!

cheers

Þá kom að því sem beðið hafði verið eftir með mikilli eftirvæntingu ... á fimmtudagskvöldið mætti Þórunn Eva á svæðið með sínu liði og voru fagnaðarfundir (eftir smátíma) hjá frænkunum. Hér voru sem sagt Palli, Hanna Sigga, Þórunn Eva og Tara Dís mætt í helgarferð til New York City og var meginmarkmið ferðarinnar að versla fyrir sig sem og aðra og var langur listi með í för. Það hjálpaði til að hér voru tvær tómar ferðatöskur hjá okkur sem máttu fá far til Íslands þannig að það var nóg af plássi fyrir allt versleríið. Ég tók Ingu Huld og Þórunni Evu að mér á laugardaginn þegar við fórum í bowling afmæli hjá bekkjarfélaga Ingu Huldar og skemmtu þær sér konunglega í bowling, borðuðu pizzur, snakk og ísköku ... margir voru undrandi og spurðu mig hvort ég ætti virkilega tvær dætur þar sem það er smá svipur með frænkunum og báðar með ljóst sítt hár. Á sunnudeginum fór ég síðan með þær í smáteiti hjá vinnufélögunum og hittu þær þar aðra stelpu sem þær gátu hlaupið og sprellað með. Á meðan gátu Palli, Hanna Sigga og Tara Dís verslað í "rólegheitunum" ... þau stóðu sig nú bara nokkuð vel, komu allaveganna heim með fulla kerru af pokum á hverjum degi og fylltu allar töskurnar þannig að það er sosum ekki hægt að kvarta yfir því ... það virtist meira að segja vera komin smávegis þreyta í liðið á þessu öllu saman.

Til að veita liðinu orku fórum við með þau á brasilískt steikhús á laugardagskvöldinu þar sem borgað er fast verð og síðan er hlaðborð með forréttum og meðlæti. Síðan ertu með miða hjá disknum þínum sem er grænn öðru megin og rauður hinu megin - grænt þýðir að þjónarnir bera fram steikur til þín á teinum og skera niður á diskinn þinn ef þú vilt fá hans tegund en rautt þýðri að þeir spyrja þig ekki. Í boði voru nokkrar tegundir af nautakjöti, (flank, sirloin, rif og prime rib), svínakjöt, lambkjöt, kalkúni og kjúklingur ... samtals voru þetta líklega um 15 tegundir sem maður hafði úr að velja - borðaði maður því á sig gat, einsog maður gat, og bragðaðist þetta flestallt saman bara mjög vel.

cheers

Var að læra að setja inn vídeó - þetta er frá concert í BIS hjá Ingu Huld.

Þar sem við eigum von á gestum á fimmtudaginn þá erum við byrjuð að byrgja okkur upp ... fórum því í dag uppá 46th street við 12th avenue í H&H bagels sem selur sem sagt beyglur í massavís og þykja þær mjög góðar. Eftir beygluleiðangurinn setti ég upp kokkahattinn ... eða öllu heldur bakarahattinn ... með Ingu Huld og bökuðum við piparkökur sem heppnuðust bara vel þó ég segi sjálfur frá.

cheers

Í dag var íslenskuskólinn hjá Ingu Huld og var þemað álfar og huldufólk ... síðan er byrjað að plana jólaballið og æfa jólasöngva og annað viðeigandi.

Dagurinn í dag nefnist Black Friday sem er sem sagt dagurinn eftir Thanksgiving og flestar útsölurnar byrja sem gerir þennan dag að stærsta verslunardegi ársins ... Sumar útsölurnar byrjuðu á miðnætti og var fólk því að versla alla nóttina og síðan beið fólk í röðum klukkutímum saman þangað til að búðir einsog Macy´s opnuðu í morgun ... hálfklikkaðir þessir kanar ... Við ákváðum nú að kíkja aðeins á fjörið og komu stelpurnar til mín í vinnuna eftir hádegi og ég hætti snemma þar sem í dag er aftur "hálfur" dagur í vinnunni. Byrjuðum við að fara í Louis Vuitton á Fifth og 56th til að kíkja þar á verk eftir Ólaf Elíasson og síðan dóluðum við okkur niður Fifth í mannhafinu og kíktum í einstaka búðir ... hittum meðal annars Jólasveininn á efstu hæðinni í Saks og var hann bara hress, ég er þó ekki viss um það hvað hann er að gera hér svo snemma ... einnig fórum við í Macy´s og alls staðar var fólk að versla, spiluð voru jólalög og maður fer bara að komast í jólaskap við þetta allt saman.

Í gær fórum við í þennan líka eðal þakkargjörðarhátíðardinner til Sigurgeirs og co ... boðið var uppá kalkún með fyllingu, sætri kartöflumús, corn mash, zucchini brauði, gulrótum og baunum ... að sjálfsögðu var síðan epla pie í desert ásamt pumpkin pie í ábæti ... alveg meiriháttar og þökkum við kærlega fyrir okkur.

cheers

HAPPY THANKSGIVING

Þrátt fyrir íslenskt sautjánda júní veður þá ákváðum við að kíkja á skrúðgönguna. Hún byrjaði klukkan 9 í morgun og horfðum við á byrjunina í sjónvarpinu og héldum síðan út í kuldann, rigninguna og rokið til að sjá herlegheitin og tókum með okkur regnhlífarnar. Við tókum metróinn uppá Grand Central og byrjuðum á að kíkja á jólatréið hjá Rockefeller Centre sem búið er að setja upp ... ég verð nú bara að segja það að þetta er langstærsta jólatré sem að ég hef nokkurn tímann séð ... það hefur nú verið maus að koma því fyrir þarna. Síðan héldum við í áttina að Times Square til að sjá skrúðgönguna. Vegna veðurs þá voru töluvert færri en búist var við þannig að það var ekki svo erfitt að komast nálægt til að sjá - sagt er að sumir séu mættir klukkan 6 um morguninn til að vera tilbúnir á besta stað. Blöðrurnar voru rosalega flottar en vegna vinds þá var ekki haft eins langt í böndunum og oft er þannig að þær svifu lágt en það var samt gaman að sjá þær og Ingu Huld fannst þetta meiriháttar.



Síðan er það kalkúnn í kvöldmatinn hjá Sigurgeiri og fjölskyldu ...

cheers - have a good one !!

Dagurinn í dag var svokallaður "hálfur" dagur þar sem markaðirnir loka klukkan 2 þá hætta flestallir um það leyti. Ég sótti því Ingu Huld í skólann og að sjálfsögðu þar sem ég var á leiðinni þangað og í rauninni þegar fríið er að byrja þá byrjar að rigna og meira að segja kom smá haglél! Veðurspáin er heldur ekki glæsileg fyrir morgundaginn með kulda, rigningu og roki ... við sem ætluðum að kíkja á Thanksgiving Parade sem er skrúðganga með risastórum blöðrum en núna vegna roks þá verða líklega engar blöðrur þar sem að einhvern tímann þá fuku blöðrurnar og ollu óskunda víðs vegar um borg ...

Það er komið jólaskraut útum allt! Búið er að skreyta skrifstofuna og setja upp jólaland í anddyrinu á byggingunni ... síðan sýndist mér að það væri verið að koma fyrir jólatréssölu á torginu á móti ... finnst mér það fullsnemmt á ferðinni ... það er einsog það sé 21 desember en ekki nóvember. Þetta tengist að sjálfsögðu Thanksgiving sem er á fimmtudaginn og skilst mér að flestir séu búnir að skreyta fyrir eða um Thanksgiving. Það er allt orðið frekar rólegt þar sem fólk tekur mikið af fríi þessa vikuna og hittist stórfjölskyldan og borðar fylltan kalkúna með cranberry sósu og epla pie í desert. Ég held því að það sé einfaldlega skynsamlegast að halda sig á Manhatta um þennan tíma og vera ekkert að hætta sér úti ferðatraffíkina.

cheers

Enn var haldið í leiðangur - núna var stefnan tekin á ellefta avenue og labbað í suðurátt í leit að nýrri byggingu eftir Frank Gehry. Hún fannst á 19da stræti og skar sig úr öllum öðrum einsog venjan er með hans byggingar.

Við löbbuðum síðan áfram niður eftir ánni þar sem klukkan 3 átti að byrja opið hús og sýning í ballettskólanum hennar Ingu Huldar. Á leiðinni stoppuðum við á einum leikvelli og áttuðum okkur síðan á því að við vorum ekki svo langt frá The Magnolia Bakery sem er Cupcake Heaven ... þar þurftum við að bíða í rúmt korter eftir því að geta keypt okkur kökur ... síðast þegar við komum þá var ekki alveg svona mikil röð. Allavega þá brögðuðust kökurnar alveg ljómandi vel og voru biðarinnar virði.

Ballettsýningin var síðan meiriháttar skemmtileg en haldin var smásýning á hverju leveli fyrir sig fyrir utan Pre-Ballet ... þannig að því miður var ekkert frá Ingu Huldar leveli. Þrátt fyrir það var gaman að sjá muninn á milli ára og hversu mikið bætist við sporin. Síðan var endað á stórustóru krökkunum þar sem stelpurnar voru komnar í táskó og strákarnir lyftu og héldu á stelpunum ... það fannst Ingu Huld mjög skemmtilegt.

cheers

Herra Níels átti afmæli 17. nóvember og varð 5 mánaða gamall - okkur finnst magnað hvað hann hefur stækkað mikið á þessum tíma sem við höfum átt hann.

Jóa þurfti að eyða deginum í skólanum í hópverkefni þannig að ég og Inga Huld sátum uppi með hvort annað. Við spiluðum Scrabble og versluðum svo í matinn - fyrir kaffið bökuðum við svo eplamuffins ... var það bara nokkuð gott hjá okkur, ég dró fram gömlu uppskriftabókina frá heimilisfræðitímum í grunnskóla og botna nú í rauninni ekkert í því hvernig þessi bók hefur fylgt okkur eftir í öll þessi ár. Allavega þá grunaði mig að okkur hlyti að takast að baka upp úr þessari bók þar sem mig minnir að ég hafi verið ansi lunkinn við það á mínum yngri árum. Kökurnar heppnuðust bara vel og fékk Jóa nýbakað muffins þegar hún kom heim sem var óvænt surprice. Í kvöldmatinn síðan grillsteiktur sverðfiskur með hot tomato salsa eftir uppskrift Jamie Olivers ... engar gamlar heimilisfræðibækur notaðar hjá henni Jóu!

cheers

Í dag var lagt af stað í gönguferð neðst suður á Manhattan en þegar við vorum komin á fimmta stræti þá skall á með hellidembu - eftir að hafa spáð og spuglerað í spilin var tekin ákvörðum um að gefast upp og snúa heim á leið. Það reyndist rétt ákvörðum þar sem það rigndi látlaust allan daginn. Fengum okkur heimabakaða köku og heitt súkkulaði til að hressa okkur við eftir alla dembuna og horfðum svo á Murel´s wedding. Ingu Huld fannst myndin voðalega sorgleg þegar að Muriel sá ekki mömmu sína þegar hún labbaði út úr kirkjunni og botnaði ekkert í þessu.

Inga Huld fór í íslenskuskólann í dag sem hefur aðsetur sitt á ræðismannsskrifstofunni hér um 23 götur upp þriðja avenue. Slatti af krökkum mætti og voru um 5 í hennar aldursflokki milli 5-7 ára, þar af ein stelpa sem var líka 6 ára. Fannst henni því gaman og ætlar að mæta aftur eftir tvær vikur.

Það hlaut að koma að því ... á þetta heimili hefur sem sagt lengi lengi vantað vél til að gera ís, ísgerðarvél, þar sem ísinn ku vera mun betri þegar hann er hrærður þegar hann frystist ... allavega þá var Jóu bent á það um daginn að KitchenAid væri búið að útbúa ísgerðarvélarapparat sem hægt er að nota á KitchenAid hrærivélina sjálfa þannig að þetta krefst lágmarksaukapláss. Þetta er mikil og sniðug uppfinning frá þeim og pöntuðum við þetta strax frá Amazon svo hægt sé að hefja ísgerðina ... en þá komu slæmu fréttirnar ... semsagt þegar við fengum apparatið sem sagt var að myndi passa á allar tegundir KitchenAid hrærivéla þá semsagt passar það ekki á evrópsku útfærsluna ;( Ástæðan er víst sú að evrópskar reglugerðir fara fram á það að það sé aukalegur járnöryggishringur á hræripinnanum sem þvælist fyrir ísgerðarvélarapparatinu ... miður slæmar fréttir það ... ég stakk uppá að saga hringinn af en Jóu leist ekki á blikuna. Góðu fréttirnar eru þær að við fundum út að líklega er búið að taka tillit til þessa vandamáls og við ættum því fljótlega að geta pantað okkur nýju útfærsluna ...

Annars allt gott að frétta - hitastigið sveiflast upp og niður og er maður einn daginn með vettlinga og vetrarjakkann hnepptan uppí háls eða maður er að kafna úr hita með allt fráhneppt ...

cheers

Helgin er búin að vera afslappelsi og rólegheit. Í gær röltum við um hverfið á vesturhliðinni og stöldruðum á einu kaffihúsi og fengum okkur heitt súkkulaði og bakkelsi þar sem það er farið að kólna verulega hjá okkur. Við fundum aðra Whole Foods Market á 24 stræti og 6 avenue sem er ekki svo langt frá okkur ... þar versluðum við íslenskar framhryggjakótilettusneiðar sem smökkuðust mjög vel. Við fórum síðan í Garden of Eden á 23 stræti til að versla eitt og annað fyrir vikuna þar sem Jóu líkar svo agalega vel við þá búð. Íslenska lambakjötið klikkaði ekki og töfraði Jóa fram eitt og annað gómsætt meðlæti.

Í dag fórum við í annan göngutúr og röltum nú upp 5th avenue ... Inga Huld fékk trefil, húfu og vettlinga fyrir skólann. Við fundum FOA Schwartz dótabúð sem er mjög flott og fræg fyrir stórt gólfpíanó sem spilað er á með fótunum - fannst Ingu Huld það ekki leiðinlegt og gátum við drepið tímann lengi þar að skoða og bardúsa. Á heimleiðinni var síðan verslað bakkelsi í Grand Central Market en því miður var Siggi´s skyr uppselt.

cheers

Noj ... í dag eru 10 ár síðan við byrjuðum að vera saman ...

HALLOWEEN

Inga Huld fór í tvær "Halloween Parade" í dag - sú fyrri var í skólanum og komu allir með búning með sér og síðan eftir hádegi var Halloween party með "goody bags" og skrúðgöngu. Þegar ég kom heim úr vinnunni fórum við í stigaganginn í "trick or treat" ... sumir voru nú ekki tilbúnir með nammi en þeir gáfu pening í söfnunarbauk sem Inga Huld var að safna í fyrir börn sem eiga ekki pening. Síðan var haldið í seinni gönguna og var hún töluvert stærri en sú fyrri. Þessi ganga sem kallast New York´s Village Halloween Parade byrjar á Spring Street og kemur síðan upp 6th Avenue og endar á 21st Street - við röltum okkur þangað enda ekki langt að fara og horfðum í smá stund á herlegheitin áður en fólksmergðin varð okkur um megn ... þessi ganga er engin smásmíð og er talið að meira en 2 milljónir séu viðstaddir ... forðuðum við okkur því yfir á 7th Avenue og var í rauninni ekkert verra að labba þar vegna þess að nóg var af fólki í búningum og margir komu líka niður þessa götu eftir að hafa klárað gönguna ... þess vegna var nóg af fjöri. Við enduðum síðan kvöldið á MacDonalds þar sem einn grímuklæddur gæddi sér á hamborgara nánast í nærbrókunum einum fata ... fannst Ingu Huld hann ekki í mjög penum búning.

cheers

Deginum var varið í verslunarleiðangur og var tilgangurinn tvennur ... í fyrsta lagi áttu sumir bara engin föt og í öðru lagi er kominn tími á að fara að kortleggja búðirnar hér þannig að hægt sé að guida fólki hér almennilega um svæðið ... fórum því í búðirnar í Soho og fundum ýmislegt og versluðum annað ... alveg hægt að fara á þessar slóðir aftur.

Ég og Jóa fórum svo í bíó á "The Queen" ... skemmtilegur breskur húmor og var hægt að hlæja að henni ... bjuggumst sosum ekki við neinni skemmtimynd. Myndin er sem sagt um það hvernig drottningin brást við andláti Díönu og spilaði Tony þar stóra rullu ... erfiðleikinn var að miklu leiti sá að það var bara ekkert fordæmi fyrir því að fyrrum konungsmeðlimur hefði dáið, þess vegna var svo erfitt að bregðast við þessu ...

cheers

Það var þvílík gleði í Whole Foods Market í dag þegar við ætluðum að kaupa lambalæri í kvöldmatinn og viti menn ... var ekki bara íslenskt lambakjöt í borðinu !! Við spurðum manninn hvað væri um að vera og upplýsti hann okkur um það að þeir kaupa íslenskt lambakjöt einu sinni á ári og eiga það yfirleitt til í ca 1 mánuð ... við keyptum að sjálfsögðu 1 stykki lambalæri en var ég hálfsvekktur með verðið. Kostaði það sem sagt jafnmikið og það nýsjálenska eða 7.99 dollara pr pund eða lbs sem er ca 1300 krónur pr kíló sem mér finnst alltof ódýrt fyrir íslenskt lambalæri í New York ... að sjálfsögðu á það að kosta allavega helmingi meira en það nýsjálenska þar sem það er að minnsta kosti tvisvar sinnum betra !!

Eftir matarinnkaupin var haldið í afmæli til Söndru sem var 7 ára í dag ... þar vorum við um eftirmiðdaginn og skemmtu stelpurnar sér konunglega og slúðruðu í baðkarinu hennar Söndru ... var Sandra í svörtum nornabúning og Inga Huld í hvítum ... mikið gaman það. Búið er að skreyta húsið þeirra fyrir Halloween einsog sjá má á myndinni sem er tekin úr anddyrinu á blokkinni ... ýmsar furðuverur þar.

Það tók síðan tvo tíma að galdra fram kvöldmatinn ... íslenskt lambalæri kryddað með hvítlauk, rósmarin, timjan, salti og pipar ... meðlæti var gulrótarmús sem voru soðnar gulrætur með smjöri og vatni og síðan maukaðar ... jurtakryddaðar bakaðar kartöfluskífur ... og koníaksrjómavillisveppasósa sem þarfnaðist slatta af fína koníakinu mínu ... þetta bragðaðist allt saman alveg súper súper vel og endaði síðan með kaldri berjasúpu borin fram með kókossorbet.

cheers

Siggi's skyr! Kom við á leiðinni heim úr vinnunni á markaðnum á Grand Central og keypti Mahi Mahi fisk í kvöldmatinn. Tékkaði einnig á Murray Hill Cheese þar sem ég vissi að Siggi´s skyr væri selt. Siggi´s skyr er sem sagt skyr framleitt hér í New York eftir íslenskri uppskrift og ákváðum við að fá okkur skyr í desert ... settum á það sykur og mjólk að íslenskum hætti og bragðaðist þetta alveg súper. Það er ljóst að við munum kaupa Siggi´s skyr aftur !! vantar bara flatkökurnar með.

Það var concert í skólanum hennar Ingu Huldar - er búið að æfa mikið og undirbúa og vorum við búin að heyra öll lögin hjá henni nokkrum sinnum undanfarnar vikur. Þetta var bara þrælskemmtilegt og var síðan te, kaffi og kökur á eftir ... ekki var boðið uppá létta áfenga drykki hér einsog iðulega var gert í London ... Síðan fengum við okkur kvöldmat á lókalnum, "The Hairy Monk" sem er írskur pöbb hérna á götuhorninu ... er ég lengi búinn að ætla að bjóða stelpunum þangar en þær hafa nú ekki verið upprifnar yfir tilboðinu hingað til ... held þó að þeim hafi fundist maturinn þarna bara prýðisgóður og er alveg hægt að smella sér þangað svona í hallæri.

cheers

Keypti mér um daginn Antonio Banderas rakspíra ... var það ekki planað og var ekki gerð mikil leit að þessum sérstaka spíra heldur var þetta sá eini sem til var í búðinni sem var minni en 3 flúid únsur sem eru 90 millilítrar. Ég var sem sagt í Chicago og var ekki með neinar baðvörur með mér þar sem ekki má taka með í handfarangur nema í "zip locked" poka og hver eining minni en 3 flúid únsur ... í rauninni var erfitt að finna tannkrem, svitalyktaeyði, rakspíra og hárgel í svona litlum einingum, en reddaðist þetta að lokum og get ég nú ferðast um með allt í handfarangri.

Jóa er búin að læra á Pay Per View á Direct TV systeminu okkar og horfum við nú á bíómyndir einsog okkur lystir ... ég hélt því þó fram að þetta myndi ekki virka þar sem leiðbeiningarnar segja að símasnúra þurfi að vera tengd til að geta keypt myndir ... en við erum ekki með neina símasnúru tengda, er ég því ekki klár á því hvernig við greiðum fyrir þetta ... sjáum til, alveg á hreinu að ekki er þetta frítt.

cheers

Fengum myndir frá Hörpu Hrund á stafrænu formi ... þessi er tekin í sófanum á Silfri á Hótel Borg og myndin af Ingu Huld er tekin í garðinum fyrir utan ÍTR. Þessi dagur var ógleymanlegur fyrir okkur og er mjög gaman að fara í gegnum myndirnar ... að auki gek ég ekki gleymt þessum magnaða mat sem var borðið uppá í brúðkaupinu ... þvílíkt lambakjöt ... útlendingarnir sem mættu skildu núna loksins hvað við meintum með því að íslenskt lambakjöt væri einfaldlega það besta.

Við gistum á Sea Creast on the Ocean sem bauð uppá nokkuð sumarbústaðalega gistingu ... var það skemmtilega íslenskt. Leiðina má sjá hér ... nema það að húsnúmerið er ekki 1899 heldur 2166 ... virðist ekki ná lengra í Google og reyndar náði það ekki heldur svona hátt í gps leiðsögukellunni. Það var reyndar skemmtilegt og í frásögur færandi að vínekran sem við heimsóttum var með húsnúmer 36255 og var það langt í frá hæsta númerið ...

cheers

Inga Huld missti eina tönn í viðbót á leiðinni heim í gær, hefur hún því misst tennurnar sitt hvoru megin við neðri framtennurnar. Tannálfurinn var óvenju gjafmildur í nótt og gaf stóran seðil ... voru ýmsar skýringar á því ... Inga Huld sagði að tönnin hefði verið aðeins brotin og því hefði hann gefið meira en ég vildi meina að tannálfurinn hefði einfaldlega ekki átt neitt smærra í þetta skiptið ... hvur veit hvað rétt er í þessu máli ...

Við eyddum afmælishelginni í "The Hamptons", nánar tiltekið nálægt bænum Amagensett sem er um 110 mílur upp eftir ströndinni á Long Island - leigðum okkur þar litla íbúð og mættum þar á föstudagskvöldið eftir 4 tíma akstur sem var tafinn af umferðartöfum og kvöldmat á ítölskum veitingastað á leiðinni ... ætlunin var nú að fara bara á einhverja ameríska vegabúllu en lentum óvænt á einum ítölskum með hvítum dúkum.

Laugardagurinn tuttugastiogfyrsti október sem var upphafið að tuttugastaogníuanda aldursárinu mínu byrjaði með afslappelsi, afmælisgjöfum, afmæliskveðjum, morgunmat og að sjálfsögðu afmælisköku ... síðan var haldið í bíltúr um svæðið. Hann hófst á því að fara á slóðir Jackson Pollock sem eyddi síðustu árum ævi sinnar þarna frá árinu 1945 og málaði meistaraverk sín sem nú seljast á milljónir dollara áður en hann keyrði ölvaður á tré árið 1956 og lést harmlegum dauðdaga. Leiðið hans má sjá á einni myndinni fyrir neðan og síðan er búið að breyta heimilinu og stúdíóinu hans í safn og fórum við í túr um það ... var það bara skemmtilegt nema að Ingu Huld fannst konan tala of mikið. Næst á dagskrá var að skanna vínekrurnar á Long Island og stoppuðum við á einni sem var Bedell Vineyard ... mikið fjör var á svæðinu og nokkrar limmósínur í innkeyrslunni ... við skelltum okkur allavega í vínsmökkunina svona í rólegheitunum þar sem við vildum nú geta keyrt heim. Vínin þarna komu vel á óvart og keyptum við okkur nokkrar flöskur til að eiga - drukkum þó rauðvínið um kvöldið með nautasteikinni sem Jóa eldaði í afmæliskvöldmatinn ... var það góður endir á góðum degi.

Á sunnudeginum keyrðum við út á endann á Long Island þar sem bærinn Montauk er og elsti viti á strönd New York fylkis (skilst mér ...), allavega byggður 1796 ... skemmtilegt var að sjá að víða var hægt að kaupa grasker og sums staðar var hægt að kaupa þau beint af akrinum ... við lögðum þó ekki í að prófa eitt slíkt. Keyrslan heim gekk síðan betur þar sem ekki var eins mikið af umferðartöfum á leiðinni og lukum við síðan afmælishelginni á víetnamskri núðlusúpu á víetnömskum stað ekki langt frá okkur.

cheers

Fundum Jackson Pollock.

Við héldum uppá fyrsta í afmæli í dag og fórum út að borða á ítalskan veitingastað rétt hjá vinnunni hans Valda ... vorum við eina fjölskyldan þar á meðal jakkafataklæddra herramanna.

Bíðum nú eftir hiturunum sem ættu að koma í hús innan nokkurra daga og verða vonandi til þess að við króknum ekki úr kulda í vetur.

cheers

Það er farið að kólna hjá okkur og var dáldið kalt hér inni í morgun - ég treysti ekki alveg á kyndinguna að halda hita á okkur hér í vetur og er að spuglera í því að fara að skoða rafmagnshitara. Sá í fréttunum í gær að það var yfir 20 cm snjór í Buffalo sem er í New York fylki um 5 klukkutíma akstur frá okkur ... stærðin á þessu landi er alveg ótrúleg ... keyrir og keyrir og kemst ekki einu sinni út fyrir fylkið!!

Núna er ég búinn að nettengja líka gömlu fartölvuna okkar þar sem Jóa notar nýju fartölvuna sína svo mikið fyrir skólann að ég og Inga Huld fáum aldrei afnot. Við keyptum í gær þráðlausan "router" og netkort - sölumaðurinn seldi mér "N" útgáfuna sem ku vera mun hraðari og langdrægnari heldur en gamla "G" systemið ... hef nú ekki mikið vit á þessu og eyddi hálfu gærkvöldinu í því að klambra öllum þessum tengingum saman og gekk þetta upp að lokum. Mér finnst þó alltaf gaman að góðum sölumönnum sem vita svona nokkurn veginn hvað þeir eru að segja - leiðinlegt að labba inní búðir og fá aldrei aðstoð eða neinn vilja hjá starfsmönnum til að selja manni eitt eða neitt. Næst á dagskrá í tæknimálunum er að koma prenturunum inná þráðlausa netið þannig ekki þurfi að tengja þá með snúru við tölvuna ... aldeilis að tæknimenningin hefur tekið yfir hjá okkur ...

Hér styttist í Halloween og er byrjað að skreyta hér og þar - Inga Huld fékk einmitt miða heim úr skólanum og á hún að koma með búning í skólann á Halloween fyrir Halloween Costume Parade.

Annars sá ég að um þetta leyti árið 2003 þá var Eva í heimsókn hjá okkur á Lullingstone Lane ... ansi skemmtilegt það !!

cheers

Ekki var mikil dagskrá fyrir sunnudaginn ... ég og Inga Huld lögðum þó af stað í leiðangur uppúr hádegi til að kaupa afmælisgjöf fyrir afmæli sem er framundan. Við vorum búin að finna á netinu að Toys´R Us ætti að vera ekki svo langt frá Empire State sem er stutt frá okkur. Eftir dáldla leit þar fundum við ekki búðina þannig að við héldum bara uppá Times Square þar sem við vissum um eina búð og Inga Huld rataði sko alveg þangað. Við gátum nú eytt rúmum klukkutíma þarna inni að skoða og spuglera og keypti Inga Huld sér Tamagotchi sem er eitthvað dýr í tölvu sem hún þarf að hugsa um ... það er greinilega ekki nóg að hugsa bara um Herra Níels. Jóa gaf sér síðan tíma til að hitta okkur í kaffi á Madison Square Park þar sem við fengum okkur heitt súkkulaði og amerískar pönnukökur með sýrópi og ávöxtum ... ekki amalegt ...

cheers

Það var heilmikil dagskrá í dag ... einfalt hjá Jóu sem þurfti að læra vegna skila á mánudaginn. Ég og Inga Huld byrjuðum því laugardaginn á því að versla og við vorum með það verkefni að kanna nýja búð á Union Square (ný í okkar augum en annars búin að vera þarna lengi). Þetta var Whole Food Market og leit hún ansi vel út - á tveimur hæðum með skemmtilegu færibandasystemi fyrir kerruna sem Ingu Huld fannst ansi sniðugt. Við versluðum fulla kerru og létum síðan senda pokana heim til að spara okkur burðinn ... tókum þó með okkur það allra nauðsynlegasta fyrir hollan og góðan brunch. Í leiðinni versluðum við mat og eitt dót í viðbót fyrir Herra Níels og svo þurfti að kaupa afmælisgjöf fyrir Candelu sem átti afmæli og var afmælispartí klukkan hálffimm seinna um daginn. Afmælið var þó ekki næst á dagskránni hjá okkur heldur var haldið út í Brooklyn þar sem Íslendingafélagið var með mannfögnuð og bauð uppá SS pylsur, íslenskt vatn og prins póló ... ekki amalegt það ... en það vantaði þó Myllu pylsubrauðin, kaninn kann bara ekki að gera góð pylsubrauð!! Þarna var margt góðra manna og kom okkur á óvart allur fjöldinn og í ljós kom að sumir bjuggu nú ekki svo langt frá okkur þannig að maður verður að passa hvað maður er að góla á íslensku úti á götu ... Við hittum þarna Sigurgeir og Co og var Inga Huld ánægð að sjá Söndru og Unni og gátu þær hlaupið úr sér vitleysuna þarna í garðinum ... skemmtu þær sér konunglega yfir hinum ýmsustu uppátækjum.

Eftir að hafa lóðsað liðið svo í metróið tilbaka yfir á Manhattan þá þurfti nú að hafa hraðan á til að geta mætt á réttum tíma í afmælið ... sem betur fer býr Candela í næstu götu þannig að við urðum ekki skammarlega sein. Þarna skemmti Inga Huld sér konunglega með bekkjarfélögum sínum og skilst mér að trúðurinn sem var líka töframaður hafi verið mjög sniðugur ...

Maturinn skilaði sér heim úr búðinni og gátum við grillað okkur nautalundir að hætti Valda og Jóu eftir uppskrift og hætti Sigga Hall ... það er þó að verða í það kaldasta til að grilla úti núna en maður lætur það nú ekki aftra sér til að geta fengið góða nautasteik!!

cheers

Það er mikil dagskrá framundan hjá Ingu Huld. Bekkjarsystir hennar Rosie ætlar að koma með heim eftir skóla til að leika og eru þær mjög spenntar fyrir því. Rosie var með Ingu Huld í bekk í Blackheath í fyrra og hittist það þannig á að hún ásamt sinni fjölskyldu flutti líka til NY í sumar og fór í sama skóla ... lítill heimur sem við búum í ... Síðan er afmæli á laugardaginn ásamt því að það er haustfagnaður Íslendingafélagsins þar sem boðið verður uppá SS pylsur, prins pólo og íslenskt vatn ... ekki amalegt!

Nú er nýja útlitið bara næstum því alveg tilbúið. Fliparnir uppi verða notaðir til að segja frá einhverju sérstöku og er einn nú þegar tileinkaður henni Ingu Huld. Einkar skemmtilegt er að allt bloggið er geymt og hægt er að skoða þá eftir ártali og mánuði - ég var t.d. að lesa fyrsta póstinn okkar frá 23. mars 2003. Þá vorum við stödd í Reading, Englandi. Ég hef verið mjög duglegur að skrifa það árið og telur það 120 pósta miðað við einungis 39 þetta árið ... ég verð greinilega að taka mig á!

cheers

Inga Huld missti tönn í gær og var henni snarlega stungið undir koddann fyrir tannálfinn ... ég náði rétt svo að biðja hana um að þurrka blóðið af henni svo að það færi ekki koddann og lakið. Tannálfurinn gaf tvo dollara og var hún ánægð með það. Ætlunin er að setja þá upp í bækur sem hún getur keypt í skólanum, þeir eru með tilboð þannig að ef við kaupum bók af þessum lista þeirra þá fá þeir eina gefins á bókasafnið líka.

Lítil flugvél flaug á háhýsi 45 strætum ofar á Manhattan frá okkur ... það er best að halda sig bara í láhúsunum. Það fór mikið fyrir umfjöllun um atvikið og í rauninni er ótrúlega mikil flugumferð í kringum og yfir Manhattan. Til dæmis er mjög flott þegar komið er til lendingar á La Guardia þá er flogið lágflug upp Manhattan á vesturhliðinni.

Horfði á Lost áðan í fyrsta skipti í langan tíma ... nafnið á þáttunum stendur fyrir sínu og ég var alveg lost ...

cheers

Stelpurnar eyddu seinni partinum af deginum á spítalanum ... hjúkkan úr skólanum hennar Ingu Huldar hringdi eftir hádegi og sagði að Inga Huld hefði slasað sig í olnboganum og henni fyndist öruggara að hún færi í röntgenmyndatöku. Þegar Jóa sótti hana í skólann þá virtist allt vera í himnalagi og ekkert mál að hreyfa olnbogann. Eftir næstum þriggja tíma bið eftir myndatökunni þá gáfust þær upp og fóru heim ... ekkert virðist heldur vera að olnboganum. Okkur þykir líklegt að skólinn neyðist til að mæla með því að farið sé með börn á spítala sem slasast ... ef hún hefði ekki mælt með því og síðan hefði komið seinna í ljós að hún væri handleggsbrotin þá væru hún ekki í góðum málum.

Þær stöldruðu svo við í fiskbúðinni á leiðinni heim og keyptu túnfiskhamborgara ... við ákváðum að prófa þá af því þeir eru alltaf svo girnilegir. Þeir smökkuðust betur heldur en laxahamborgararnir sem við keyptum fyrir þó nokkru síðan sem voru ekkert spes.

cheers

Það var skrítið að vera einn í fríi í dag. Jóhanna sá sér þó auman á mér og fór með mér í göngutúr í morgun - gengum yfir í Chelsea og svo niður í West Village, veðrið var mjög gott og hverfin skemmtileg. Fengum okkur svo kaffi, croissant og pain au chocolat á frönsku kaffihúsi á leiðinni heim ... Jóa fór svo í skólann og ég dundaði mér í ræktinni og sá í sjónvarpinu að það væri skrúðganga í tilefni dagsins á 5th Avenue. Ætlaði ég að kíkja á hana á heimleiðinni og mótmæla Columbusi en þegar ég mætti á svæðið þá var ekkert um að vera ... missti ég því af henni og var það ágætt.

Hér á síðunni eru nú aldeilis breytingar í gangi einsog glöggir lesendur hafa eflaust tekið eftir. Það eru einhver vandræði með íslenska letrið en það verður nú vonandi í lagi fljótlega ...

cheers

Fórum í þetta líka fína partý í gær hjá Sigurgeiri og Co ... það var sem sagt "Housewarming Party". Inga Huld kom með og lék hún með Söndru og Unni þangað til þær gátu ekki haldið sér lengur vakandi. Slatti af Íslendingum var á svæðinu og var því íslenskur partýfílingur yfir þessu ... mjög gaman.

Dagurinn byrjaði á því að Inga Huld þurfti að fara í sprautu hjá lækninum, er það hluti af bólusetningardagskránni hennar. Hún er ekkert voðalega ánægð með að þurfa að fá allar þessar sprautur. Við fengum síðan Gísla og collega hans Ásgeir í hádegismat í dag ... var boðið uppá scrambled eggs, beyglur og kleinuhringi frá Dunkin Donuts ... svipaður matseðill og þegar Maggi kom um síðustu helgi ... ekki amalegt.

Versluðum síðan lambafillet hjá kjötsalanum í kvöldmatinn ... eftir að hafa valið hálfan lambahrygg sem við ætluðum að grilla að íslenskum hætti í heilum bita þá kom í ljós þegar heim var komið að butchernum hafði tekist að skera hana niður í kótilettusneiðar ... vorum ekki alveg ánægð með það en kjötið var þó mjög gott að lokum hjá okkur ... sló þó ekki út íslenska lambakjötið sem við fengum í brúðkaupsmatinn ... hugsa að það sé mjög erfitt að gera betur en það.

cheers

Það er farið að kólna hjá okkur - hitastigið í dag fór alveg niður í 12 gráður en sem betur fer hlýnaði aðeins aftur seinni partinn og kominn var 16 gráðu hiti ... líður að því að taka þurfi fram vetrarúlpurnar!! Ekki er stefnt að því þessa helgina að borða jafn fínt úti og um síðustu helgi en það byrjar nú með "Housewarming Party" hjá Sigurgeiri og Co í kvöld - erum við að dressa okkur upp fyrir það. Vinnudagurinn í dag endaði snemma eða milli 15 og 16 þar sem það er frídagur á mánudaginn ... hefðin er alltaf að síðasta virka dag fyrir frídag þá er unnið stuttan dag. Ég vissi þó ekki fyrr en í gær að það væri frídagur ... það er sem sagt Columbus Day en það er þó ekki frídagur hjá Ingu Huld og Jóhönnu - einhver togstreita er hvort þetta eigi að vera almennur frídagur eða ekki ... ég verð því einn eitthvað að dunda mér á mánudaginn. Það er þó alveg á hreinu að ég ætti ekki að halda uppá Columbus Day heldur mæta galvaskur í vinnuna og mótmæla þessu sem frídegi þar sem það er ekkert merkilegt þegar Columbus fann Ameríku ... miklu nær væri fyrir mig að því að komast að því hvenær Leifur Eiríksson fann Ameríku og krefjast þá frídags ... Leif Eiriksson Day.

cheers

Inga Huld er með tvær tennur lausar og virðist önnur þeirra alveg vera komin að því að detta - mikill spenningur er fyrir því hvað tannálfurinn gefur fyrir tönn í New York miðað við hvað hann gaf í London.

Við fengum gesti í gær - Maggi var á leið heim frá Chile og Bryndís kom frá Íslandi - hittumst seint og síðar meir á Nobu 57 þar sem mikil töf var á JFK. Ég og Jóa biðum þolinmóð og unnum okkur gegnum kokteillistann á meðan. Maturinn var alveg hreint meiriháttar og staðurinn mjög flottur líka, við fengum okkur meðal annars King Crab Tempura, Sashimi, Black Cod og snöggsteikt nautakjöt ... algjört namminamm ... mælum hiklaust með þessum stað en það þarf þó að panta með góðum fyrirvara eða svona ca 1 mánuð. Í kvöld er síðan stefnt á steikhús ... fólk getur ekki komið til New York án þess að fá góða steik!

cheers

Þetta var hálfgerð letihelgi hjá okkur núna, allavega hjá mér og Ingu Huld þar sem Jóa þurfti að læra og vinna í hópverkefnum. Í gær fórum við í Madison Square Park á scooternum og Inga Huld lék sér í leiktækjunum heillengi áður en við hittum Jóu á Union Square og versluðum í matinn. Ég eldaði nautafillet í kvöldmatinn sem við keyptum hjá butchernum á 2nd avenue milli 22nd og 23rd street - höfðum við ekki verslað við hann áður en nokkrum sinnum kíkt á úrvalið í borðinu.

Í dag var svo enn meira letilíf ... bókalestur og sjónvarpsgláp. Dröttuðumst út um kaffileytið og röltum þá uppá Times Square þar sem stefnan var sett á Toys´r us ... Inga Huld er nefnilega að fara í afmæli hjá Rosie á miðvikudaginn eftir skóla. Var nú hægt að eyða smá tíma í dótabúðinni að skoða og spuglera ... t.d. var komið dáldið af nýju playmoi og nóg var úrvalið af Barbie ... Inga Huld er nefnilega byrjuð að plana jólagjafalistann og er líklega af nógu að taka þar sem hún sér oft og iðulega eitthvað í auglýsingatímanum á teiknimyndastöðunum sem henni langar í. Það er þó merkilegt að á einni stöðinni, líklega Disney stöðinni, þar eru oft bílatryggingaauglýsingar og Inga Huld er orðin ansi þreytt á þeim gæja og dæsir og stynur hvað í óskpöpunum hann sé að gera þarna að trufla það sem hún sé að horfa á ... í raun og veru er ég alveg sammála henni, er ekki alveg að ná markhópnum hjá fyrirtækinu. Sé kannski tvo hópa - annar er heimavinnandi húsmæður (-feður) sem sitja yfir skjánum með börnunum og hinn er sá að þeir reyna að sannfæra kaupandann snemma að kaupa sínar vörur ... sú tækni virðist þó fara öfugt í dóttur okkar þar sem ekki er séns á því að hún eigi eftir að skipta við þetta bílatryggingafyrirtæki. Allavega fengum við okkur síðan snemmbúinn kvöldmat á "Olive Garden" sem er á Times Square - er sá staður allt í lagi í hallæri en ekkert sérstaklega spes.

cheers

Það er mikil öryggisgæsla á Manhattan núna, sérstaklega í kringum hús sameinuðu þjóðanna þar sem nú er allsherjarþing hjá þeim. Bygginguna þeirra má t.d. sjá á myndinni fyrir neðan í bakgrunni frá skólanum hennar Ingu Huldar. Mér skilst að það sé óvenju mikil gæsla núna og margar götur lokaðar og slatti af lögregluþjónum á hverju götuhorni - fínu hótelin eru víggirt þar sem allir þjóðhöfðingjarnir gista ...

Annars þá er Herra Níels með kvef - fór til læknis í dag í nokkrar sprautur og fékk meðal í leiðinni ... að öðru leiti var hann við góða heilsu. Inga Huld keypti fyrir hann enn eitt nammið í dýrabúðinni þar sem hann er svo matvandur að hann borðar ekkert nema bara standard matinn sinn og ekkert annað ... loksins núna fann hún eitthvað sem honum líkaði.

cheers

Það var heilmikil dagskrá fyrir daginn. Við vorum komin á fætur fyrir klukkan níu og fyrsta verk var að prófa tölvusímann sem við hlóðum niður og fengum loksins í gegn hjá Símanum. Prófuðum að hringja í Unufellið og Sunnubrautina og allt virkaði í himnalagi. Allavega þá er símanúmerið 499-0606 og þeir sem eru á Íslandi eða með aðra tölvusíma geta hringt í þetta númer og borga íslenskt innanlandssímtal fyrir - við svörum ef við erum heima og kveikt er á tölvunni ... dáldið sniðugt. Síðan var stefnan tekin á að skrá Ingu Huld í ballet - við vorum búin að finna ágætis skóla, Joffrey Ballet School, sem er á Avenue of the Americas, öðru nafni 6th Avenue á milli 9th og 10th street sem er ca 30 mínútna gangur frá okkur - hingað mun hún koma í einn og hálfan tíma eftir skóla á fimmtudögum og nema þá list að dansa ballet. Eftir skráninguna þurftum við að kaupa balletföt og var okkur bent á að fara í Danskin á milli 67th og 68th og kaupa "Light Blue Leotard", "Pale Pink Tights" og "Pink Leather Ballet Slippers". Þetta fannst Ingu Huld nú ekki leiðinlegt verkefni og hlakkar mikið til að byrja í alvöru ballet skóla! Heimleiðin frá búðinni gekk þó ekki vel og virtist ekkert ganga upp hjá okkur í metróinu - við lærðum að A línan er express línan fyrir C línuna og stoppaði ca 60 götum ofar heldur en þar sem við ætluðum að fara út. Síðan voru tvær línur lokaðar þannig að heimferðin sem var áætluð 30 mínutur tók 90 mínútur.


Jóhanna þurfti að skreppa í skólann að vinna í einhverju hópverkefni og ég og Inga Huld höfðum það verkefni að kaupa dót fyrir Herra Níels, hann var nefnilega búinn að bókstaflega slátra músinni á veiðistönginni, bæði búinn að slíta allar fjaðrir af henni og loks naga teygjuna í sundur af sjálfri stönginni. Við fundum ýmislegt sniðugt, meðal annars bolta fastan innan í hring þar sem Herra Níels getur ýtt í boltann og snýst hann þá í hringi, eltir hann boltann og reynir að ná honum en boltinn fer bara hraðar og Herra Níels nær honum ekki - þannig gengur þetta áfram endalaust og finnst honum þetta mjög sniðugt. Ingu Huld fannst samt ekki sniðugt þegar við löbbuðum upp Park Avenue að það var lokað að hluta vegna þess að það var verið að taka upp bíómynd - þetta er reyndar ekki í fyrsta skipti sem við lendum í því að þurfa að taka á okkur krók vegna bíómyndaupptöku. Á götuna var búið að raða drulluskítugum bílum og stilla upp grasi og stráum svona hér og þar - síðan var rauður og glæsilegur Ford Mustang með áfastar myndavélar tilbúinn til að vera filmaður - í honum var stór hundur í framsætinu sem var reyndar ekki alvöru. Við erum þó spennt að sjá hvort við munum sjá þessa mynd í bíó en allavega sáum við engan frægan á svæðinu. Inga Huld var þó alveg viss um að það væri ekki verið að filma Ice Age 3 þar sem að það þyrfti að gerast uppi í fjöllum þar sem snjórinn væri en það væri þó ekki gott að þurfa að loka skíðasvæðinu á meðan filmað væri ... ýmsar pælingar í gangi ...

Í kvöldmatinn var síðan grillaður skötuselur með kartöflum og salati. Í tilefni laugardagsins var einnig desert - ávextir með rjóma ... namminamm ...

cheers

Nenntum ekki að eyða tíma í matarinnkaup og eldamennsku þar sem við vorum bæði svo seint á ferðinni þetta föstudagskvöldið. Ég hitti því skvísurnar á Dos Caminos sem er mexíkóskur veitingastaður sem við höfðum nokkrum sinnum framhjá hér í nágrenninu á Park milli 25th og 26th og leist vel á. Var maturinn mjög góður, sérstaklega guacamole sósan - við fengum okkur quesedillas og enchiladas - getum alveg mælt með þessum. Staðurinn var ótrúlega stór og flottur og var hann stútfullur þegar við komum kl. 7 og enn fyllri þegar við fórum 2 tímum seinna. Hefði verið til í að prófa margaríturnar þarna ... gerum það seinna.

Svo er bara helgin framundan - aldeilis ágætt það!

cheers

Inga Huld og Herra Níels eru orðnir bestu vinir (nema þegar Herra Níels ruglar öllu playmoinu) og hlaupa saman fram og tilbaka í íbúðinni. Á myndinni má sjá uppáhaldsleikfangið sem virkar eiginlega einsog veiðistöng - þetta finnst Herra Níelsi voðalega gaman að elta og stökkva á eftir og er í miklum veiðiham, hefur hann nokkrum sinnum "slátrað" músinni sem er á endanum. Hann er líka mjög forvitinn og skoðar allt sem kemur heim og treður sér ofaní og gegnum ýmislegt. Við vorum t.d. farin að sofa í gær þegar mjög veiklislegt mjálm heyrðist öðru hvoru. Nokkrum sinnum fór ég að leita að Herra Níelsi til að athuga hvað væri að en hann fannst hvergi. Að lokum ákvað ég að tékka í fataskápinn og viti menn, þar var Herra Níels ekki alveg ánægður með tilveruna.

Loksins, loksins byrjar Inga Huld í skólanum á morgun og hlakkar hana mikið til - fengum hluta af skólabúningunum í kvöld en þó ekki allt þar sem fyrsta sendingin var alltof stór. Sumarkjóllinn hennar er bleikur og lítur alveg ágætlega út en vetrarbúningurinn er rauðgrá köflóttur kjóll sem er ekki alveg okkar tískulitur en virðist mjög klassískur breskur skólakjóll ... það verður bara að venjast.

Barnfóstra byrjaði hjá okkur á mánudaginn og verður helsta verkefni hennar að sækja Ingu Huld í skólann og koma með heim þar sem Jóhanna er alltaf svo seint í skólanum sínum. Henni og Ingu Huld kemur mjög vel saman og eru þær búnar að fara út á leikvöll og í göngutúra á scooternum. Stefnan er einnig sett á að nýta hana sem barnapíu einhver kvöld þannig að það sé hægt að fara að kíkja á lífið hér í NYC!!

Ætli maður reyni ekki núna að kjósa hann Magna Rockstar Supernova nokkrum sinnum í viðbót á rockstar.msn.com - það er nokkuð merkilegt að fólk hér virðist taka eftir honum og þeirri staðreynd að hann sé Íslendingur ... nú er það ekki bara Björk og Sigurrós frá Íslandi heldur einnig Magni.

cheers

Ég og Inga Huld fórum með Jóu ég skólaverkefnisferð í gær. Hún þurfti að skoða svæðið þar sem hún á að hanna byggingu samkvæmt fyrirmælum kennarans. Staðurinn er ekki svo langt frá en er þó á Long Island - gátum við því tekið subway þangað. Við röltum um svæðið og svo niður að ánni þar sem við gátum notið útsýnisins yfir á Manhattan og var gaman að sjá turnana frá öðru sjónarhorni.

Inga Huld fór aðeins í skólann sinn í gær - það var kynningardagur og fengu foreldrar að mæta með og hitta kennarana, skoða skólastofurnar, bókasafnið og svoleiðis. Þetta leit allt saman voðalega vel út og fyrsta verkefnið hjá krökkunum var að taka verðmiðana af dótinu þar sem allt er nýtt. Einnig þurftum við að skipta öllum skólabúningsfötunum og fá minna þar sem skólabúningssalinn klúðraði málunum ... við vorum ekki þau einu sem lentu í þessu og virtist þetta hafa farið út um þúfur hjá manninum. Við eigum að fá nýtt sent fyrir fyrsta skóladaginn á miðvikudaginn í næstu viku. Inga Huld er orðin spennt að byrja í skólanum og er það vel skiljanlegt að hún sé orðin leið á því að hanga svona. Hún fór á scooternum sínum í skólann og virðist það ætla að verða framtíðarferðamátinn hjá henni og er hún farin að renna sér af miklum móði á þessu apparati.

Annars virðist vera ágætis veðurspá fyrir helgina og hefur hlýnað hér aftur ... ég þarf að fara að taka sængina mína úr sængurverinu aftur þar sem það er orðið svo heitt hér inni.

cheers

Eftir vinnu fórum ég og Inga Huld útað Hudson River og var Inga á scooternum sínum. Við fórum með nokkur blöð í skólann hennar Ingu Huldar og síðan fengum við okkur göngutúr meðfram ánni. Sáum við þar ýmislegt sniðugt - flugvél lenti á ánni og lagði síðan að árbakkanum, leigubílabátur þeysti nokkrum sinnum framhjá og síðan voru menn að veiða. Þeir voru dáldið spaugilegir með nokkrar stangir fastar við grindverkið og búnir að hengja upp bjöllur á stangarendana. Við sáum einn fisk veiddan - ég bjóst nú ekki við að sá væri glæsilegur en hann var alveg silfraður og fínn. Maðurinn sem veiddi hann var mjög stoltur og sagðist hafa verið þarna í 13 klukkutíma og ekki fengið neinn fisk. Hann hélt því fram á meðan að hann var að hala inn að hann væri 80 pund ... en mér sýndist hann svona ca 20 sinnum smærri en það ... samt ágætis fiskur.

Á myndinni má sjá Empire State til vinstri - í hægri turninum beint fyrir aftan Ingu Huld er skólinn hennar sem er á jarðhæð alveg við ánna og lengst til hægri er bygging UN.

Á laugardaginn gekk Ernesto yfir með ausandi rigningu og tilheyrandi leiðindum. Okkur tókst þó að finna nokkrar bókabúðir í nágrenninu þar sem Jóa þurfti að kaupa arkitektúrabækur fyrir skólann. Ein var nálægt Union Square sem ku vera með besta úrval listabóka í New York - ekki dugði það til og fannst ekki allt sem til þurfti. Um kvöldið komu svo Elín, Sigurgeir, Sandra og Unnur í kvöldmat. Kisinn vakti mikla lukku og hrifningu og fékk mikla athygli. Í matinn var túnfisk og laxa sashimi í forrétt, síðan kjúklingabitar á rósmarínstilkum í aðalrétt og að lokum var heimagerður broddgaltavanilluís með berja og makkarónu mauki ... algjört nammi!! Þrátt fyrir lítið eldhús þá virtist alveg ganga að galdra þar fram góðan mat. Stelpurnar dunduðu sér langt fram eftir nóttu við leik og virtust ánægðar að fá leikfélaga. Skólinn byrjar í næstu viku hjá Ingu Huld þannig að fríinu fer að ljúka fljótlega hjá henni sem ég held að henni hlakki mikið til að gerist - alveg búin að fá nóg af þessu hangsi.

Á sunnudeginum sváfum við lengi og hvíldum okkur vel og vandlega - það var líka einhver þreyta í liðinu. Seint og síðar meir drösluðumst við út og fórum á Guggenheim safnið og kíktum á sýningu hjá arkitektinum Zaha Hadid og sáum einnig sýningu á málverkum Jackson Pollock ... mjög menningarlegur dagur hjá okkur. Fundum síðan þetta líka fína austurríska kaffihús tveimur götum frá og fengum okkur heitt kakó, samlokur og súkkulaðikökur - engan kvöldmat þurfti eftir þetta!

Kisinn er búinn að fá nafn - hann heitir Herra Níels og valdi Inga Huld það nafn.

cheers

Inga Huld var með flensu í vikunni - á fimmtudaginn var hún laus við hitann og var hjá mér hálfan dag í vinnunni þar sem Jóa þurfti að fara í skólann. Inga dundaði sér mest allan tímann á internetinu á ceebeebies síðunni.


cheers

Fyrsti sólarhringurinn hjá kisa gekk bara nokkuð vel - hann var þó dáldið hissa á þessu öllu saman og kannaði alla íbúðina mjög vel og mjálmaði með hálfgerðum vælistón. Fyrst héldum við að hann vildi sofa undir rúmi hjá Ingu Huld og virtist sem hann væri dáldið öruggur með sig þar undi en hann sættist síðan seint um kvöldið að leggja sig á teppi og púða sem við útbjuggum fyrir hann inni í horni hjá Ingu Huld. Hann vaknaði þó nokkrum sinnum og hálfgrét en komst þó loks í gegnum nóttina - vildi svo snemma í morgun sofa uppí hjá okkur eða Ingu Huld. Það er bara ansi mikið fjör í honum og hoppar hann hér og skoppar um allt - Inga Huld sér um að hann sé ekki uppi í stólum og rúmum og reynir að siða hann til og svo leika þau sér saman með bolta og tuskumýs. Núna er hann sofandi uppí í sófa og Inga Huld er að horfa á barnaefni - við keyptum einhvern standard pakka af sjónvarpsrásum og það þýðir aðgangur að 125 stöðvum, þar af slatti af barnastöðvum ... þetta ætti að duga okkur eitthvað frameftir hausti.

Inga Huld nýtur þess þó ekki nógu vel að vera með honum þar sem hún er komin með hita og er ekki í neitt miklu stuði - hún jafnar sig þó fljótlega á þessu og tekur upp fyrri gleði.

Fyrstu helgina okkar hérna þá leigðum við okkur bíl til að keyra aðeins um svæðið og kíkja út fyrir Manhattan með það að markmiði að stoppa í nokkrum búðum - þægilegra að versla svoleiðis og stærri verslunarmiðstöðvar. Að sjálfsögðu var fyrsti viðkomustaðurinn IKEA á Long Island og við þurftum reyndar að fara einnig í IKEA í New Jersey þar sem ekki var allt til sem okkur vantaði í fyrri búðinni ... mér fannst það dáldið skondið að oft er sett út á kanana sem koma til Evrópu og leita sér uppi McDonalds til að borða á ... hef ekki efni á því að setja útá það lengur þar sem það fyrsta sem við leitum okkur uppi hér í Ameríku er einmitt IKEA.

cheers

Jæja, þar kom að því ... loksins fjölgun í fjölskyldunni!! Hér fyrir neðan má sjá nýjasta fjölskyldumeðliminn sem fæddist þann 17. júní 2006. Kisinn sem enn hefur ekki fengið nafn var sóttur til Brooklyn núna í kvöld og er karlkyns af exótísku stutthára kyni sem er afbrigði af persnesku kattakyni. Hann hefur alla sömu eiginleika og skapgerð og sá persneski nema hann er með styttri og viðhaldsminni feld. Inga Huld var og er einkar spennt fyrir honum og tókst henni að leika við hann með bolta og tuskumús í bandi. Þau eru núna farin að sofa bæði tvö.


Best að halda svo áfram að kjósa hann Magna í Rockstar Supernova ... það verður að standa með sínum löndum!!

Vorum að kíkja á addressuna okkar í Google Earth og kemur hún ekki alveg rétt þar ... við erum sem sagt 5 húsum til hægri en þar sem Google Earth staðsetur okkur. Hægt er að fletta okkur upp með addressunni 214 East 25th Street, NY 10010. Ef einhver mundi síðan vilja senda okkur bréfapóst þá þarf að bæta við íbúðarnúmeri 5RE - Google Earth kemst ekkert nær okkur með því að bæta íbúðarnúmerinu við!

Inga Huld var annars hress og kát í dag eftir að hafa leikið sér við Söndru og Unni. Ég sótti hana þar sem Jóa var í skólanum frameftir kvöldi og tókum við núðlur með okkur heim í kvöldmatinn. Inga Huld hafði valið að hafa lasagna en breytti snarlega um skoðun þegar ég bauð henni núðlur. Síðan beið okkar pakki heima með fjórðu seríu Simpson sem við byrjuðum svo að horfa á.

cheers

Fórum í heimsókn til Sigurgeirs og co í dag að sjá nýja pleisið þeirra á áttugustaogáttunda stræti við fyrsta avenue á fertugastuogannarri hæð, nánar má sjá um það á heimasíðu þeirra sem er hér á vinstri hliðinni. Fórum svo með þeim í kvöldmat út að borða á mjög góðan ítalskan stað þar sem þeirra gámur frá London er ekki kominn enn og því lítið um húsgögn í íbúðinni þeirra ... einungis flygill, sófasett, sjónvörp og dýnur ... hvað þarf maður sosum meira?? Ingu Huld fannst meiriháttar gaman að hitta Söndru og Unni og ætlar að fara aftur í heimsókn til þeirra á morgun á meðan Jóa byrjar í skólanum.

Tók eftir því áðan að veðurmyndin hér á hægri hliðinni sýndi sól og blíðu en þegar ég leit út um gluggann þá var bara rigning og leiðindi. Áttaði ég mig þá á því að myndin var að sýna veðurfarið í London en ég er náttúrulega staddur núna í New York ... fljótlega lagfærði ég þetta og núna sjáið þið því rétt veðurfar hér hjá okkur, nánar tiltekið er þetta samkvæmt veðrinu í Central Park sem er ca. 40 mínútna gangur frá okkur.

cheers

Fórum í gær í Chinatown - höfðum nefnilega lesið að þar væri að finna ferskasta fiskinn á Manhattan. Fundum allavega tvo flotta fisksala og keyptum við hjá þeim lúðu og rækjur en mjög girnilegt hjá þeim voru líka humrar, krabbar og allskyns skelfiskur. Ingu Huld leist þó ekkert á krabbana sem klipu út í loftið með klónum sínum. Röltum síðan um hverfið og fengum okkur Dim Sum í kaffinu. Versluðum okkur einnig ýmislegt annað í kvöldmatinn sem var með asísku ívafi - experimentuðum með Dim Sum og sashimi. Á heimleiðinni fórum við í gegnum litlu Ítalíu og merkilegt að sjá mismunandi stemninguna í þessum nærliggjandi hverfum.

Hitastigið er orðið viðunandi hér og var næstum langermaveður með hitastigi bara um 20 gráðurnar. Loftkælingin heima fer sjaldnar í gang sem er ágætt þar sem það eru töluverð læti í henni.

cheers

Þetta er nú meira draugabloggið ... greinilega ekkert um að vera á þessum bænum!! ... eða hvað?? Í stuttu máli sagt þá:
- endurtrúlofuðum við okkur í París og ákváðum loks giftingu.
- Valdi fluttur til í vinnu til New York.
- Heather Close í London seld til Indverjanna í þarnæsta húsi.
- öllu pakkað í gám og sent þvert yfir Atlantshafið á afmælisdaginn hennar Ingu Huldar.
- gifting með pomp og prakt á Íslandi þann 15. júlí 2006.
- ógleymanleg brúðkaupsferð til Kenýa í ævintýralegt safarí og rómantíska stranddvöl.
- íslensk sumarbústaðadvöl og veiðiferð (3 laxar þetta sumarið).
- allsherjarflutningur til New York þann 6. ágúst frídag verslunarmanna og tekið á móti gámnum þann 7. ágúst.

Síðan hefur New York verið könnuð og skönnuð og við verið að koma okkur fyrir í nýja pleisinu. Skólinn að byrja hjá frúnni og Ingu Huld og við loksins komin með nettengingu heima eftir töluverða bið.

Látum þetta duga að sinni - vonum að einhver sé enn að líta hér við.

Með kveðju frá New York
Valdi, Jóa og Inga Huld

Allir komnir aftur heim í slotið ... við sóttum Ingu Huld út á flugvöll áðan og ekki var meira mál fyrir hana að fljúga núna tilbaka ... er hún búin að dvelja í góðu og miklu yfirlæti hjá ömmum sínum á Íslandi.

Við hjúin skemmtum okkur vel í rómantíkinni í París, vorum komin þangað seint á föstudagskvöldinu með Eurostar og síðan tilbaka eftir hádegi í dag ... erum reyndar frekar dösuð og þreytt ... erfitt að vera svona rómantískur! Nokkur atriði sem standa upp úr voru Sigurboginn, hádegismatur í Eiffelturninum, skoðunarferð í Notre Dame og óperuhúsinu, nokkur vel valin listaverk í Louvre (hæglega hægt að villast hér og týna heilum degi!), Moulin Rouge og eitt og annað eins og nokkur Pain au Chocolat og crepes ...

au revoir !!

Enn erum við bara ein í kotinu. Fórum í gær útaðborða "ekki" í tilefni af Valentínusardeginum - ég hafði pantað borð á Sketch Library og var það alveg feikilega gott ... forrétturinn var þó ekkert spes en mjólkurlambið í aðalrétt sló í gegn ... desertarnir líka góðir og ég meina þá desertar í fleirtölu þar sem þeir voru 4 talsins, í raun var það aðeins of mikið af því góða í orðsins fyllstu merkingu. Við unnum síðan lengi í dag og hittumst á London Bridge og fengum okkur kvöldmatarsnarl á stað rétt hjá Borough Market ... erum eiginlega að "njóta" þess að þurfa ekki að drífa okkur beint heim eftir vinnu. Spurningin er síðan hvort þetta sé svona dæmigerð vika hjá okkur ef við værum barnlaus - erum búin að fara útaðborða þrisvar sinnum (1 sinni nokkuð gott, 1 sinni rosa flott og 1 sinni í lagi og ódýrt) og einu sinni keyptum við mat til að stinga í ofninn og borðuðum á meðan við horfðum á Sahara á DVD.

Allavega erum við búin að bóka rómantísku Parísarferðina og er semsagt lestarferð eftir vinnu á föstudagskvöldið - túristarúntur, -sigling og hádegismatur í Eiffelturninum á laugardaginn ásamt Moulin Rouge cabaret um kvöldið. Meira er í raun ekki planað þar sem erfitt er að fá borð á veitingastað á laugardagskvöldið en við erum að plana laugardagseftirmiðdaginn þar sem við fjárfestum í túristahandbók um París - stefnan er sett á þægilegan göngutúr um miðbæinn í rólegheitunum.

Inga Huld skemmtir sér annars vel á Íslandi þótt hún hafi nælt sér í einhverja magapest í dag - hún verður eflaust orðinn hraust og hress á morgun og til í slaginn.

cheers

Þá erum við hjúin bara ein í kotinu þar sem Inga Huld er nú um þetta leytið að lenda í Keflavík. Við keyrðum hana áðan á Stansted og kvaddi hún okkur við öryggishliðið klukkutíma fyrir brottför þar sem starfsmaður fór með hana um borð. Var hún rosalega dugleg og knúsaði okkur og kyssti og var síðan bara stefnan sett á Ísland án þess að hika!! Amma og afi biðu líka heima á flugvellinum og hlakkaði hana mikið til að hitta alla heima ... einnig hjálpaði til að það var búið að fjárfesta í dvd spilara sem hún var búin að læra á þannig að hún ætlaði að horfa á Línu Langsokk á leiðinni og var með pening til að kaupa sér djús og snakk með því. Mjög íslenskt týpiskt var það að þegar einhver kona í röðinni heyrði að hún væri að fara heim þá bauðst hún til þess að fylgja henni og taka hana að sér - var hún mjög indæl og fékk hún sæti við hliðina á henni. Inga Huld kynntist henni því aðeins þarna og þegar við vorum síðan að bíða og fá okkur að borða þá sagði hún okkur að hún ætlaði að sýna henni dótið sitt og láta hana hjálpa sér með dvd spilarann ... það var því ágætt að hún var komin með vinkonu í flugvélinni. Við erum því bara tvö ein núna í rúma viku og vitum eiginlega ekki hvað við eigum að gera við okkur ... líklega skellum við okkur bara til Parísar ...

cheers

Inga Huld var í sínu vanalega social lífi um helgina og fór í afmæli í Greenwich - bíó og síðan útaðborða á cafe rouge - og var það víst alveg meiriháttar gaman. Þegar við borðuðum desertinn í kvöld þá datt önnur framtönn hjá henni - var hún búin að vera laus dáldið lengi en var farin að vera mjög "wibbly wobbly" í dag. Líklega kemur þá tannálfurinn í nótt ... allavega verða mikil vonbrigði ef að tönnin verður ennþá undir koddanum þegar við vöknum í fyrramálið!

cheers

Fórum á foreldrafund eða kennarafund í skólanum hennar Ingu Huldar í gær. Kennarinn var bara hæstánægður með Ingu Huld, sérstaklega hversu miklum framförum hún hefur tekið í lestri og hversu skemmtilegt henni þykir í stærðfræðinni. Hún er líka orðin duglegri og segir ekki eins oft "I´m soooo tired in my hand ..." ... þannig að það var bara ekki yfir neinu að kvarta og allir voðalega glaðir og kátir. Kennarinn var líka mjög ánægður með að heyra að Inga Huld uppfærir okkur um það sem hún er að læra í skólanum einsog t.d. þá sagði hún okkur allt um nýja árið í Kína sem var að koma og einnig að fólk á að hvíla sig á sunnudögum og fara í kirkju af því að guð kláraði að skapa heiminn á laugardeginum ... ágætis upprifjun fyrir okkur ...

Annars byrjaði hún í dag í klúbbi í skólanum sem kallast "Funky Monkey Key Skills" og er sem sagt hljómborðskennsla - alveg meiriháttar gaman og kom alveg heilluð heim í dag ... greinilegt að einhver tónlistaráhugi er fyrir hendi.

cheers

Fórum í göngutúr í gær í Greenwich Park, eða sem sagt ég og Jóa gengum á meðan Inga Huld hjólaði. Þurfti að taka hjólið í gegn og hækka hnakkinn og þvíumslíkt - greinilegt að sumir eru að stækka. Okkur finnst síðan best að hjóla bara beint áfram og er hún þess vegna alltaf langt langt á undan okkur nema að við sprettum úr spori - æfing dagsins var því að hjóla í hringi, snúa við og beygja og svoleiðis ... gekk það bara nokkuð vel.

Annars er jukkan okkar hálfdöpur þessa dagana - virðist þetta hafa byrjað áður en jólatréinu var fleygt úr stofunni þannig að ekki virðist hún sakna jólatrésins. Kannski er það frekar sú staðreynd að hún var flutt útí hornið á stofunni og fékk ekki eins mikla athygli og jólatréið sem olli því að hún varð niðurdregin. Enn ein skýringin er sú að jólatréið hafi reynt að drepa jukkuna ... ekki veit ég hvaða aðferðum jólatréið beitir til þess en sumir hafa þessar kenningar. Við vonum að hún hressist við núna með því að hún er vökvuð sérstaklega vel og alltaf nægri athygli beint að henni ...

cheers

Ennþá kalt í London þó það sé ekki eins kalt og á meginlandi Evrópu þar sem fólk frýs úr kulda í orðsins fyllstu merkingu. Vorum með veislumat í kvöld þar sem tengdapabbi var á ferðinni - dáldið spaugilegt að fá svona kvöldmatarheimsókn en mjög notalegt ... buðum uppá roastbeef með heimagerðu remúlaði, steiktum rauðlauk og frönskum kartöflum, alltof gott og ekki gaf súkkulaðikakan í desert neitt eftir!

cheers

Það er eitthvað lítið um skriftir um þessa dagana - best að skrifta dáldið núna. Ástæða þessa skriftaleysis er vegna ferðalaga en nú eru allir heima. Hér er bara skítakuldi og var allt í klakabrynju í gærmorgun og sýndi mælirinn mínus tvær heilar gráður! ... og var það meira að segja á mælinum sem yfirleitt er frekar hagstæður ... Það var nú aðeins skárra veðrið á Boca í Flórída þar sem ég þurfti (því miður ...) að vera viðstaddur ráðstefnu - erfitt stundum að vera í vinnunni - sérstaklega þarna þar sem það var svo kalt inni að það þurfti að fara út fyrir í 25 stiga hitann og sólskinið til að hita sig.

Annars bara lítið um að vera og fátt um fréttir ... allir bara í góðum gír og lífið í vanagang ...

cheers !!

Það er hálftíðindalaust héðan úr London - gengur á með hitasveiflum, allt frosið einn morguninn og síðan uppí tíu stiga hiti um helgina. Grillaði úti nautalundir í gær og voru þær súper góðar ... ætlaði nú ekki að leggja í það að grilla vegna þess að það var hálfkalt og síðan voru smávegis dropar ... hugsaði svo með mér að þetta væri nú bara mjög gott grillveður á íslenskum mælikvarða þannig að ég skellti mér bara í dæmið. Annars var bara mikil afslöppun um helgina og kláraði ég meðal annars jólabókina mína, Vetrarborgin eftir Arnald Indriðason. Var bara nokkuð góð þó það sé dáldið spaugilegt að lesa um Sigurð Óla, Elínborgu og Erlend leysa mjög dularfullt morðmál í Breiðholtinu ... einhvern veginn hálfótrúlegt ...

Ég verð síðan á ferðalagi í vikunni og skil stelpurnar bara eftir - byrja í stóra eplinu NY en flýg síðan suður á bóginn og verð á ráðstefnu ekki langt frá Miami ... skilst að veðrið þar sé bara nokkuð gott - gengur á með sólskini og hlýindum.

Í gær fórum við Inga Huld í bæinn að dunda okkur - byrjuðum á því að kíkja hvort eitthvað væri í bíó á Leicester square en fundum ekkert spennandi. Röltum því í bókabúð á Oxford Street og keyptum þar Narnia bók fyrir Ingu Huld - í HMV gátum við síðan keypt okkur geisladiska, keyptum meðal annars disk með Emilíönu Torrini sem verður spennandi að heyra í. Við fórum í fyrsta skipi í Apple búðina á Regent Street og þvílík búð !! Ingu Huld fannst feikigaman á efri hæðinni þar sem voru nokkrar tölvur með krakkaforritum og hún dundaði sér heillengi þar á meðan ég fann mér hulstur utan um nýja ipoddinn minn. Við fengum okkur svo hamborgara og kjúklinga fingra með "smælí feis" kartöflum á TGI Fridays á leiðinni heim en gátum ekki yfirgefið Leicester square þó á heimleiðinni án þess að fá okkur smávegis Haagen Daz í desert ... nammi namm !!

Núna í dag vorum við svo aftur saman og held ég að Ingu Huld langi þó bara að fara að byrja aftur í skólanum. Hún var þó hörkuduleg á scooternum sínum og æfði sig að ýta sér áfram og láta sig svo renna bara. Við reyndum líka að láta gera við útvarpið í bílnum en einsog áður hefur komið fram þá er það læst þar sem þurfti eitthvað pin númer á það. Ég fann hér nálægt búð sem virðist gera ýmislegt í bílarafmagni og spurði hvort hann gæti hjálpað mér - hann sagðist geta reddað málunum og "decodað" útvarpið fyrir mig fyrir "twenty quitt" - ég samþykkti það og tók hann þá útvarpið úr bílnum og ég má sækja það á morgun ... ég er mikið að spá í því hvort ég eigi nokkurn tímann eftir að sjá þetta útvarp aftur.

cheers

Lífið fer nú bráðum allt að færast í samt horf eftir jóla- og áramótagleðina. Inga Huld byrjar í skólanum á þriðjudaginn og hlakkar mikið til þess - orðin þreytt á því að hanga svona heima þótt að henni hafi fundist á jólunum gleði og gaman hóhóhó ... á jólunum gleði og gaman hóhóhó.........

Mamma er á fullu að huga að umsóknum fyrir næsta ár því að stefnt er að masters gráðu ... þannig að ég og Inga Huld þurftum að leyfa henni að nota tímann í að undirbúa möppu og annað þvíumslíkt. Þess vegna fórum við í Sainsbury og vorum síðan með "surprice party" sem að Inga Huld stakk uppá. Hún heimtaði að kaupa kort í Sainsbury og skrifa í það til mömmu og svo var snakk í forrétt ásamt bjór (sem hjálpaði vonandi til við sköpunargleðina í möppuvinnunni milli forréttar og aðalréttar) og í aðalrétt kokkaði ég einhverja kjúklingalundir í nir-pir sósu sem kom tókst nú bara nokkuð vel ... þó ég segi sjálfur frá. Annars tókst okkur að klára smákökurnar í dag fyrir utan nokkrar marsipankökur sem eru nú alltaf góðar bara svona á kvöldin þannig að þær teljast varla með sem jólasmákökur ... þetta var sem sagt mjög passlegt.

GLEÐILEGT NÝTT ÁR !!!

Áramótin hér voru bara nokkuð fjörug - ég og tengdó fórum sérferð í um 40 mílur út frá London í spes búð til að kaupa flugelda á föstudeginum til að það væri nú hægt að sprengja gamla árið og fagna nýju ári á hefðbundinn íslenskan máta. Það var heldur ekki erfitt að toppa nágrannana og vera sprengjukóngur hverfisins þar sem enginn annar var að standa í neinum rakettusýningum. Nágrannarnir voru því límdir með nefið á rúðunni á meðan við sendum upp okkar 24 rakettur og einhvern slatta af tertum - Inga Huld skemmti sér líka konunglega með stjörnuljósin. Kvöldmaturinn var algjört æði - ferskar tiger rækjur í forrétt og í aðalrétt þessi líka magnaði dádýrahryggur sem sló heldur betur í gegn enda var búið að nostra við hann hálfan daginn. Síðan þar sem ekki var nóg af sprengjum hér heima þá skelltum við okkur í bæinn með síðustu lestinni fyrir miðnættu og slógumst í hóp með öðrum 200 þúsund Lundúnabúum og horfðum á flugeldasýningu hjá London Eye. Ég verð nú eiginlega að viðurkenna að þetta var flottasta flugeldasýning sem ég hef séð og sló út menningarnæturflugeldasýninguna hans Alfreðs í Orkuveitunni !! Það rigndi síðan kampavíni á miðnætti þegar fólk í miðri þvögunni var í því að hrista og opna kampavínsflöskur - sem sagt allir í miklu stuði og Inga Huld skemmti sér konunglega á háhesti en sofnaði svo í lestinni á heimleið.

Í gær voru svo allir dáldið þreyttir þannig að við gengum bara um Greenwich og slöppuðum af. Í dag var síðan sprett úr spori og haldið á útsöluna í Harrods sem er nú bara almennileg útsala - fullt af afslætti og var verðið þá orðið viðráðanlegt!! Inga Huld fékk kjól, ég skó og síðan græjaði tengdó fyrir okkur jólagjöfina sem var viðbót í nýja hnífaparasettið. Eftir að hafa rölt síðan aðeins um miðbæinn líka voru allir orðnir dauðuppgefnir og það strax á öðrum degi í nýárinu.

GLEÐILEGT NÝTT ÁR !!!