Okkur tókst að kaupa síðustu jólagjöfina í dag ... við áttum gamla karlinn eftir, hann er dáldið erfiður ... en fundum loksins eftir miklar pælingar alveg rosa græju!

Við erum annars búin að borða svo góðan mat um helgina. Í gærkvöldi kom Atli vinur hans Kristjáns í heimsókn og var þá eldað rib-eye með góðri rauðvín, gulrótum og parsnips - klikkar aldrei. Áðan vorum við síðan með túnfisk - algjört nammigott ... verður notaður í staðinn fyrir skötuna á þorláksmessu!

Það er heldur betur búið að lappa uppá Sainsbury, hverfisverslunina okkar - þeir eru búnir að vera að stækka hana í ca 4 mánuði og síðan var hún lokuð í heila viku um daginn á meðan verið var að fylla á. Því var mikill spenningur þegar opnað var aftur og viti menn að þetta er bara allt önnur búð! Mun stærri og mikil tæknigræja í rúllubandinu sem liggur frá bílastæðinu í kjallaranum upp í búðina (og tilbaka aftur) - þegar kerran er keyrð inná bandið þá festist hún og getur maður því bara andað rólega (á báðum leiðum) og þarf ekki að drösla kerrunni áfram. Verst væri líklega ef maður væri á hraðferð og vildi hlaupa upp (eða niður) og er það þá ekki hægt þar sem að ekki er hægt að hagga kerrunni ...

... svona er nú lífið spennandi í London !!

Í dag þurfti einnig að versla englaföt á litla engilinn okkar þar sem hún á að leika í söngleik í næstu viku í skólanum sínum. Á hún þar að syngja ásamt öðrum í söngleiknum Hósanna Rokk ... er hún búin að vera að æfa sig öðru hverju hér heima og tekur miklar ballöður með tilheyrandi handa- og fótahreyfingum.

Annars allt gott að frétta og nóg að gera. Jólagjafirnar fara til Íslands á mánudaginn með honum Stjána þannig að allt er í góðum málum - sáum jólatré til sölu í dag í Sainsbury og vorum að spá í að versla eitt til að setja upp í stofunni ... það þarf nú að gera eitthvað við alla þessa jólapakka sem hafa hlaðist upp hérna hjá okkur eftir að hann Stjáni kom.

cheers

Kristján mættur á svæðið galvaskur með 30 kíló af farangri. Hans eigið hafurtask vigtar eitthvað um 5 kíló ... og var því ekki glaður á svip þegar hann var búinn að drösla þessu öllu saman frá Heathrow. Restin af farangrinum eru sem sagt jólagjafir og íslenskur jólamatur! Ekki amalegt og greinilegt að fleiri eru snemma í jólagjöfunum þetta árið en við. En þetta var nú einmitt málið að núna getur Kristján dröslað aftur heim á klakann jólagjöfunum frá okkur ...

magnað ... kláruðum jólainnkaupin í dag - þ.e.a.s. að við hófum jólainnkaup í morgun kl. 11 og lukum þeim kl. 17 !! Síðan er innpökkun hálfnuð ... ástæðan fyrir þessum tíma á jólagjöfunum er sú að Kristján kemur og fer um næstu helgi og var ákveðið að hlaða á hann pökkunum. Líka mjög gott að vera búin að þessu og þá getum við snúið okkur að jólabakstrinum sem fyrst ...

Vorum að ljúka við að bóka jólaferðina okkar; er hún með óvenjulegu sniði þetta árið þar sem á annan í jólum er ferðinni heitið á Runónum yfir Ermasundið til Frakklands þar leið liggur í gegnum Belgíu og Hollands til Dusseldorf og gist verður eina nótt á hóteli þar. Eldsnemma á þann þriðja er síðan leiðinni haldið áfram til Danmerkur og endað eftir ca 1217 kílómetra í Óðinsvéum hjá Ingibjörgu Evu.

Það er nú orðið töluvert síðan að stafur var settur inná þessu síðu! Loksins er internetið komið í gagnið og hefur það tekið sinn tíma - enda voru hér í dag tveir menn á sama tíma frá sitthvoru fyrirtækinu að tengja fyrir okkur breiðband, annar frá NTL og hinn frá BT - auðvitað gat það gerst að þegar loksins eitthvað gerðist að þá þyrftu fyrirtækin að senda menn á sama hálftímanum! En það er saga að segja frá þessu - löng og frekar leiðinleg ...

Annars allt í góðu hér, við náttúrulega flutt og er núna ca 30 sekúndum lengra að ganga í lestina. Inga Huld á fullu í skólanum að læra að lesa og skrifa, Jóhanna að læra að teikna og byggja og ég ... humm ... bara vinn ...

Látum þetta nægja í bili þar sem ekki má sjokkera systemið með skyndilegri ofskrifun.

cheers