Mikil dagskrá var um helgina þar sem amma og afi komu á föstudeginum. Í tilefni dagsins var boðið uppá nautacarpaccio að hætti þeirra Jamie og Jóu þar sem nautalund er grilluð í 7 mínútur og síðan sneidd í þunnar sneiðar og borin fram með beetroots og horseradish sósu ... á eftir var síðan létt pasta með rækjum og súkkulaðitart í desert ... sosum ekki mikið haft fyrir liðinu. Laugardagurinn var þéttskipaður - byrjað í Sainsbury þar sem við þurftum að versla fyrir vikuna og amma keypti Taste the Difference jólakökur til að taka með heim. Eftir stærðarinnar brunch var lagt af stað í bæinn þar sem stefnan var tekin á Victoria Palace Theatre þar sem átti að sjá stórsöngleikinn Billy Elliot. Sýningin var alveg meiriháttar skemmtun og fannst Ingu Huld skemmtilegt en var þó orðin dáldið þreytt á að sitja svona lengi. Henni fannst þó ekkert sniðugt eitt atriðið þar sem tveir strákar voru að máta og klæða sig í kjóla og sagði bara að strákar ættu ekki að vera í kjólum. Við fórum svo á Oxo Tower Brassserie í kvöldmatinn sem stóð undir sínu - staðurinn er á áttundu hæð við Thames með fínu útsýni yfir borgina og sést t.d. St. Pauls mjög vel. Einnig var skemmtilegt að nokkrar flugeldasýningar voru í kring í tilefni dagsins og sást það vel þar sem við vorum. Heima biðu síðan eftir okkur rakettur og tertur sem þurfti að sprengja og gátum við dundað okkur við það í rólegheitunum úti í garði frameftir kvöldi. Inga Huld hélt á fullt af stjörnuljósum og fannst þetta ekki amalegt.

Kannski þarft aðeins að útskýra hvers vegna allt þetta flugeldadæmi var í gangi í gær ... sem sagt var Bonfire night eða Guy Fawkes day. Í stuttu máli reyndi þessi Guy Fawkes að sprengja upp kónginn og þingið árið 1605 en upp komst um plottið og öllum bjargað - af því tilefni var kveikt á brennum og þetta þróaðist yfir í flugelda einnig með tímanum. Það er því búið að vera dáldil gamlárskvöldsstemmning hér mað rakettulykt og sprengjuhvellum í loftinu. Það bætti síðan á stemninguna að hér eru borðaðar jólakökur, stollen og panforte svona þegar tækifæri gefst til!!

Við skutluðum síðan ömmu og afa útá Heathrow í dag sem Ingu Huld fannst ekki skemmtilegt ... við komum við á leiðinni heim í Bluewater og fékk hún að kaupa límmiða og límmiðabók þar sem hún fékk 10 af 10 rétt á spelling testinu á föstudaginn.

cheers